काणकोण : एरव्ही पावसामुळे पडणारे खड्डे काणकोणात पाऊस नसतानाही दिसू लागलेत. मात्र काणकोणमध्ये मडगाव कारवार महामार्गाच्या हमरस्त्यावरील खड्ड्यात पाणी पाणी साचल्याचं चित्र आहे. या खड्ड्यांमुळे अपघात झाले असले तरीही अजूनही रस्त्यांवरील खड्डे तसेच असल्याचं चित्र आहे. (Potholes on road in Canacona News Updates)

पाऊस नसतानाही काणकोणमधील (Canacona) खड्ड्यात पाणी दिसत असल्याने आता शहरात चर्चाही सुरु झाली आहे. खड्ड्यात पडून दुचाकीस्वार गंभीर जखमी होण्याचे प्रकार वारंवार घडत आहेत. मडगाव-कारवार हमरस्त्याच्या गुळे भागात हमरस्त्याच्या काही भागातून जलपुरवठा वाहिनी आहे. या वाहिनीची जोडणी तुटून परिसरातील हमरस्त्यावर ठिकठिकाणी खड्डे पडले आहेत. त्या खड्ड्यांमध्ये पाणी साचल्याने वाहन चालकांना खड्डयाचा अंदाज येत नाही आणि साहजिकच अपघातांना (Accident) निमंत्रण मिळत आहे.

दोन दिवसांपूर्वी असाच एक दुचाकीस्वार गुळे भागातील या खड्ड्यात पडून अपघात झाला होता. अपघातात त्याच्या डोक्याला गंभीर दुखापत झाली आहे. या दुचाकीचालकावर सध्या गोमेकॉ (GMC) इस्पितळात उपचार सुरु आहेत. त्वरित फुटलेली जलवाहिनी दुरुस्त करून खड्डे बुजवावे, अशी मागणी स्थानिक नागरिकांनी केली आहे.