पणजी: अग्निशमन आणि आपत्कालीन सेवा संचालनालयाद्वारे 14 एप्रिल रोजी होणाऱ्या राष्ट्रीय अग्निशमन दल दिनानिमित्त विविध स्पर्धांचे आयोजन केले असून यंदा ‘अग्निसुरक्षा शिका, उत्पादकता वाढवा’ या शीर्षकाखाली या उपक्रमाचे आयोजन केले आहे.

या जनजागृती मोहिमेचा भाग म्हणून 3 एप्रिल रोजी राज्यातील प्राथमिक आणि माध्यमिक शाळेतील मुलांसाठी पोस्टर स्पर्धा आयोजित केली आहे. ही स्पर्धा दोन गटांमध्ये विभागली आहे. पहिल्या गटात 7 ते 10 वर्षे वयोगटातील मुलांसाठी स्पर्धा आयोजित केली असून विषय: “शाळा अग्निसुरक्षा” असा आहे तर दुसरा गट 11 ते 14 वर्षे विषय : “अग्निसुरक्षा नियोजन”(फायर सेफ्टी प्लॅनिंग) अग्निशमन दलातर्फे नियोजित केंद्रात सकाळी 10 वाजता स्पर्धेला सुरवात होणार असून विद्यार्थ्यांनी रंग व ओळखपत्र घेऊन येणे गरजेचे आहे. स्पर्धेसाठी कागद आयोजकांतर्फे पुरविण्यात येतील. ज्या शिक्षक किंवा पालकांना स्पर्धेसंबंधी अधिक माहिती हवी असल्यास जवळच्या अग्निशमन केंद्राशी संपर्क साधावा किंवा https://dfes.goa.gov.in या वेबसाईटला भेट द्यावी.