पणजी: पर्वरी येथील ‘हॉटेल निओ मॅजेस्टिक’बाहेर झालेल्या गोळीबारप्रकरणी गुन्हे शाखेने आठव्या फरार संशयिताला मुंबईतून अटक केली. दीनानाथ त्रिलोकी कोरी (३२, रा. चिखलवाडी, सुमन नगर, चेंबूर, मुंबई) याला चुनाभट्टी परिसरातून ताब्यात घेण्यात आले.

पोलिसांना मंगळवारी (२९ सप्टेंबर) सायन-ट्रॉम्बे रोड परिसरात कोरी याच्या हालचालींबाबत तांत्रिक व गुप्त माहिती मिळाली होती. त्यानुसार गुन्हे शाखेच्या पथकाने तांत्रिक देखरेखीच्या आधारे त्याचा माग काढला. त्यानंतर चुनाभट्टी परिसरात सापळा रचून त्याला अटक करण्यात आली. दरम्यान, कोरी याच्या चौकशीतून गोळीबाराच्या गुन्ह्यात वापरण्यात आलेल्या दोन वाहनांची माहिती पोलिसांना मिळाली. त्यानुसार पोलिसांनी दोन्ही वाहने शोधून काढून पंचनामा करून जप्त केली.

न्यायवैद्यक पथकाच्या उपस्थितीत वाहनांची जप्ती करण्यात आली असून, त्यांची फॉरेन्सिक तपासणी केली जाणार आहे. ही कारवाई गुन्हे शाखेचे पोलीस निरीक्षक तुषार लोटलीकर आणि पोलीस उपअधीक्षक सूरज हळर्णकर यांच्या मार्गदर्शनाखाली करण्यात आली. पीआय महेश गडेकर, पीएसआय माधव नाईक, पोलीस कॉन्स्टेबल सुनील बेगूर आणि उद्देश शिरोडकर यांच्या पथकाने कारवाई केली.