पणजी: यंदाच्या गणेश चतुर्थीत पर्वरीतील वाहतूक कोंडी दूर होणार आहे. साडेपाच किलोमीटरचा उड्डाणपूल गणेश चतुर्थीपूर्वीच पूर्ण केला जाणार आहे.

या उड्डाणपुलाच्या डांबरीकरणाची सुरुवात पणजीकडील बाजूने सार्वजनिक बांधकाममंत्री दिगंबर कामत (Digambar Kamat) यांच्या उपस्थितीत करण्यात आली. त्यावेळी त्यांनी ही घोषणा केली. कामत यांनी जाहीर केले की, पर्वरी येथील सहापदरी उड्डाण मार्ग प्रकल्प पूर्ण करण्याचे उद्दिष्ट आता गणेश चतुर्थीपर्यंत (सप्टेंबर २०२६ मध्य) ठेवण्यात आले आहे. यापूर्वी निश्चित केलेल्या अंतिम मुदतीपेक्षा हा कालावधी पुढे आणण्यात आला आहे.

निर्धारित कालावधीपूर्वीच काम पूर्ण

सुमारे ४५० कोटी रुपयांहून अधिक खर्चाच्या या महत्त्वाच्या पायाभूत प्रकल्पातील हा एक महत्त्वाचा टप्पा मानला जातो. गेल्या काही महिन्यांत ५.१५ किमी लांबीच्या या उड्डाण मार्गाच्या कामाला वेग आला असून, यामुळे शासनाने ऑक्टोबर-नोव्हेंबर २०२६ या आधीच्या लक्ष्याऐवजी आता सप्टेंबरमधील गणेश चतुर्थीपर्यंत प्रकल्प पूर्ण करण्याचे नवे उद्दिष्ट निश्चित केले आहे.