Marol Police Nab Woman for Job Scam For 14 Lakhs

फोंडा: नोकरीचे आमिष दाखवून प्रियोळ येथील एकाला १४ लाख रुपयांना गंडवल्याप्रकरणी जुने गोवे येथील श्रावणी ऊर्फ पूजा नाईक ऊर्फ रुपा पालकर (३९) हिला म्हार्दोळ पोलिसांनी अटक केली आहे.

संशयित श्रावणी हिने अशाच प्रकारे इतर काही युवकांना गंडा घातल्याची शक्यता असून त्यादृष्टीने म्हार्दोळ पोलिस अधिक तपास करत आहेत. विशेष म्हणजे श्रावणी ही पर्वरी येथील सचिवालयात नोकरीला आहे.

प्रियोळ येथील गुरुदास गावडे यांच्या दोन मुलांना सरकारी नोकरीला लावते असे सांगून त्‍यांच्‍याकडून श्रावणीने १४ लाख उकळले होते. हे प्रकरण २०२१ मध्ये घडले होते. पैसे देऊन बराच काळ लोटला तरी नोकरीचा पत्ता नसल्याने गावडे यांनी श्रावणीकडे पैशांची विचारणा केली असता तिने हात वर केले. शेवटी तिच्‍याविरोधात पोलिसांत तक्रार करण्‍यात आली. आणखी काही लोकांना संशयित महिलेने गंडावल्‍याची शक्‍यता आहे.