Ponda Police Awareness Campaign Against Crime

फोंडा: राज्यातील वाढत्या चोऱ्या आणि ज्येष्ठ नागरिकांना ठकवण्याचे प्रकार घडत असल्याने फोंडा पोलिसांनी या प्रकाराविरुद्ध लोकांत जागृती करण्याच्या उपक्रमाला वेग दिला आहे. फोंडा पोलिस स्थानकाचे निरीक्षक विजयनाथ कवळेकर यांनी आपल्या वरिष्ठांच्या मार्गदर्शनाखाली जनजागृती करण्याबरोबरच सुरक्षिततेसाठी पोलिसांना सहकार्य करण्याचे आवाहन केले आहे.

फोंड्यात आज सराफी दुकानांतील सुरक्षिततता लक्षात घेऊन सर्व व्यापाऱ्यांना बोलावून घेऊन त्यांचे म्हणणे ऐकून घेतले. सराफी दुकाने चोरट्यांकडून टार्गेट करण्याचे प्रकार घडत असल्याने त्यादृष्टीने सर्व दुकानदारांनी आपल्या दुकानात सीसीटीव्ही कॅमेरे लावण्याबरोबरच इतर खबरदारीही घेण्याचे आवाहन पोलिस निरीक्षक विजयनाथ कवळेकर यांनी केले.

राज्यातील चोरटे रस्त्यावर एखाद्या ठिकाणी ज्येष्ठ नागरिक पाहून त्यांना काहीतरी विचारण्याच्या उद्देशाने अशा ज्येष्ठ नागरिकांच्या खास करून महिला वर्गाच्या गळ्यातील सोनसाखळी किंवा मंगळसुत्र हिसकावून पळ काढण्याचा प्रयत्न करीत असल्याने अशा लोकांबद्दल काही शंका असल्यास त्वरित पोलिसांशी संपर्क साधावा, असे आवाहन फोंडा (Ponda) पोलिसांनी केले आहे. सायबर गुन्हेही होत असल्याने मोबाईल बँकिंग तसेच इतर घटनांमुळे पैसे चोरले जात असल्याने बँक ग्राहकांनी सुरक्षितता बाळगावी असे आवाहनही यावेळी करण्यात आले.

वाहतूक सुरक्षेसंबंधी जनजागृती

फोंड्याचे वाहतूक पोलिस निरीक्षक कृष्णा सिनारी यांनीही वाहतूक सुरक्षेसंबंधी बैठक घेऊन जनजागृती केली. राज्यात अपघातांचे प्रमाण वाढले असून प्रत्येकाने खबरदारी घ्यायला हवी, असे कृष्णा सिनारी यांनी सांगितले. वाहनचालक तसेच इतरांची यावेळी उपस्थिती होती. फोंड्यातील रस्त्याच्या कडेला पार्क करून ठेवण्यात येणारे ट्रक हटवले जात असून आवश्‍यक दंडही केला जात आहे, अशीही माहिती वाहतूक पोलिसांनी दिली. फोंडा भागात वाहतूक सुरक्षा व्यवस्था चोख ठेवण्यासाठी पोलिस कार्यरत असल्याची माहितीही यावेळी देण्यात आली.

पोलिस समर्थ आहेच, पण सहकार्य करा!

एखाद्या गुन्ह्याचा तपास करण्यासाठी पोलिस समर्थ आहेतच, पण नागरिकांनीही पोलिसांना आवश्‍यक सहकार्य करण्याची गरज पोलिस निरीक्षक विजयनाथ कवळेकर यांनी व्यक्त केली. सायबर गुन्हे वाढल्यामुळे आणि ज्येष्ठ नागरिकांना टार्गेट केले जात असल्याने विशेषतः युवा वर्गाने आपल्या घरातील तसेच शेजारील ज्येष्ठांना जागरूक करण्यासाठी प्रयत्न करावेत, असे आवाहन करण्यात आले. आपल्या अवतीभवती वावरणाऱ्या लोकांचा संशय आल्यास त्वरित पोलिसांकडे संपर्क साधा, असेही आवाहन विजयनाथ कवळेकर यांनी केले.