Ponda Crime: 'दागिने घालून फिरू नका, काढून पिशवीत ठेवा आणि घरी जा...', फोड्यांत महिलेला असा घातला गंडा

फोंडा: ढवळी - फोंडा येथे मुख्य रस्त्यावर एका महिलेचे दागिने दुचाकीवरून आलेल्या दोघाजणांनी आपण पोलिस असल्याची बतावणी करून पळवण्याचा धक्कादायक प्रकार घडला आहे. या महिलेचे सुमारे चार ते पाच लाख रुपयांचे दागिने पळवले असून फोंडा पोलिसांत या प्रकरणी तक्रार देण्यात आली आहे.

ही घटना आज (मंगळवारी) संध्याकाळी चारच्या सुमारास घडली. ढवळी येथीलच ही महिला रस्त्याने चालत जात असताना दोघेजण दुचाकीवरून तिच्याजवळ आले आणि आपण पोलिस आहोत, सध्या चोऱ्यांचे प्रकार वाढले आहेत, त्यामुळे हे दागिने घालून फिरू नका, काढून पिशवीत ठेवा आणि घरी जा, असे सांगून या भामट्यांनी त्या महिलेला दागिने काढायला लावले व एका कागदात गुंडाळून परत या महिलेकडे दिले. या दागिन्यात सोनसाखळी, तसेच हातातील बांगड्यांचा समावेश होता.

ते दोन्ही भामटे पसार झाल्यानंतर या महिलेने कागद उघडून पाहिला असता त्यात दगड असल्याचे पाहिल्यावर आपण फसलो गेल्याचे तिच्या लक्षात आले. विमनस्कअवस्थेत ही महिला तेथेच रस्त्याच्या कडेला बसून होती. त्यानंतर या महिलेचे नातेवाईक आले आणि त्यांनी पोलिसांत तक्रार दिली आहे.

फसवणारी टोळी?

पंचसदस्य तसेच इतरांनी त्या बाईला धीर दिला आणि पोलिस त्या दोन्ही चोरट्यांना शोधतील, असे सांगितल्यावर ही महिला घरी परतली. फोंडा पोलिस त्या चोरट्यांच्या शोधात सध्या आहेत. राज्यात अशा प्रकारे महिलांना फसवणारी टोळी वावरत असल्याचा संशय असून महिलांना संमोहित करून त्यांच्याकडून दागिने काढून घेण्याचे प्रकार चालले असल्याचा आरोप ढवळीतील महिलांनी केला.