Ponda councilor fake signature document case

फोंडा: फोंडा पालिकेच्या मुख्याधिकाऱ्यांची खोटी सही करून उत्पन्नाचा दाखला दिल्याप्रकरणी फोंड्याचे नगरसेवक शिवानंद सावंत आणि दाखला ज्याच्या नावावर आहे, त्या सदानंद प्रभुगावकर या दोघांनाही फोंडा पोलिसांनी अटक केली. सदानंद प्रभुगावकर हा तिवरे - माशेल येथे राहतो. तीन आठवड्यांपूर्वी याप्रकरणी फोंडा पालिकेचे मुख्याधिकारी योगीराज गोसावी यांनी फोंडा पोलिस स्थानकात तक्रार नोंदविली होती.

सिल्वानगर - फोंडा येथील सदानंद प्रभुगावकर याच्याकडे फोंडा पालिकेची हा बनावट स्वाक्षरी असलेला उत्पन्नाचा दाखला सापडला होता. प्रभुगावकर याने आपल्या मुलीला गोमेकॉत परिचारिका अभ्यासक्रमासाठी प्रवेश घेण्यासाठी हा उत्पन्नाचा दाखला घेतला होता. मात्र, अन्य दुसऱ्या कारणासाठी जेव्हा उत्पन्नाच्या दाखल्याची गरज भासली, तेव्हा हा पूर्वीचा दाखला पालिकेत दाखवण्यासाठी आणावा लागतो, त्यावेळी पालिका मुख्याधिकाऱ्याची बनावट सही करून परस्पर हा दाखला दिल्याची ही बनवेगिरी सापडली.

फोंडा पालिकेच्या मुख्याधिकाऱ्यांनी फोंडा पोलिस स्थानकात या बनवेगिरीप्रकरणी १३ डिसेंंबरला तक्रार दाखल केली होती. या तक्रारीची शहानिशा करून पोलिसांनी १९ डिसेंबरला गुन्हा नोंदवून तपास सुरू केला. गोमेकॉ तसेच इतर संबंधितांकडे पोलिसांनी चौकशी केली; पण संशयित नगरसेवक शिवानंद सावंत आणि उत्पन्नाचा दाखला ज्याच्या नावावर आहे, त्या सदानंद प्रभुगावकर या दोघांनीही एकमेकांना बोटे दाखविली होती. त्यामुळे पोलिसांनी या दोघांनाही अटक केली.

दरम्यान, सदानंद प्रभुगावकर याला एक दिवसाची पोलिस कोठडी सुनावली आहे, तर नगरसेवक शिवानंद सावंत याला उद्या (शुक्रवारी) न्यायालयात हजर केले जाणार आहे. फोंडा पोलिस याप्रकरणी अधिक तपास करीत आहेत.