फोंडा: येथील अग्निशमन दलाच्या आवारात सरकारी जागेत खासगी पेट्रोलपंप उभारण्याच्या हालचाली सध्या सुरू असून फोंडावासीयांनी या पेट्रोलपंपला तीव्र विरोध करीत आपली हरकत दक्षिण गोवा जिल्हाधिकारी कार्यालयात सोमवारी दाखल केली आहे.

कोणताही मुलाहिजा न बाळगता कशाप्रकारे पेट्रोलपंपचे परवाने दिले जातात, त्याची ही एक झलक आहे.विद्यालय तसेच लोकवस्ती आणि स्मशानभूमी जवळ असलेल्या फोंड्यातील अग्निशामक दलाच्या आवारात सुमारे अकराशे चौरस मीटर जागेत हा पेट्रोलपंप येऊ घातला आहे.

या विरोधात फोंड्यातील जॉन मास्कारेन्हस, विराज सप्रे आणि सुदेश नाईक यांनी आपली हरकत दाखल केली आहे. फोंड्यातील अग्निशामक दलाच्या आवारात मुख्य रस्त्याच्या बाजूलाच हा पेट्रोलपंप येऊ घातला आहे,

त्याला कुणाची हरकत असल्यास त्यांनी दक्षिण गोवा जिल्हाधिकारी कार्यालयात दाखल करावी, अशी जाहिरात वर्तमानपत्रात आल्यानंतर याबाबतची माहिती फोंडावासीयांना मिळाली.

विद्यालय, स्मशानभूमी जवळ असूनही!

फोंड्यातील मुख्य रस्त्यावर ज्या ठिकाणी आल्मेदा हायस्कूल तसेच मुक्तिधाम स्मशानभूमी अगदी जवळ आहे, शिवाय समोरच निवासी संकुल आहे, अशा ठिकाणी हा पेट्रोलपंप येणार आहे. वास्तविक विद्यालय, स्मशानभूमी आणि निवासी संकुल जवळ असल्यास पेट्रोलपंपला परवानगी दिली जात नाही, मग या ठिकाणी पेट्रोलपंप आणण्याचे प्रयोजन काय, असा प्रश्‍न जॉन मास्कारेन्हस आणि विराज सप्रे यांनी उपस्थित केला.

सरकारी जमिनीचा गैरवापर?

फोंड्यातील या सरकारी जागेत अग्निशामक दलाची वास्तू आहे, अशा ठिकाणी आणि जवळच विजेचा ट्रान्स्फॉर्मर आहे, ज्या ठिकाणी अग्निशामक दलाच्या वाहनाची येजा सुरू असते अशा ठिकाणी पेट्रोलपंपसाठी नियोजन करण्यात येत आहे. संबंधित इंधन कंपनीकडून अशाप्रकारची सूचना कशी काय केली जाते, असा प्रश्‍न फोंडावासीयांना पडला आहे. त्यामुळे सरकारी जमिनीचा गैरवापर केला जात आहे, अशी टीका फोंडावासीयांकडून केली जात आहे.