फोंडा: फोंड्यातील भाजपचे उमेदवार रितेश नाईक यांच्यासोबत आपण असून प्रचारावेळी आपण आपले समर्थक उपस्थित राहणार असल्याची ग्वाही फोंड्यातील भाजपचे नेते विश्‍वनाथ दळवी यांनी फोंड्यात घेतलेल्या पत्रकार परिषदेत दिली. यावेळी विश्‍वनाथ दळवी यांचे समर्थक शौनक बोरकर व अभिजीत गावडे उपस्थित होते.

भारतीय जनता पक्षाचा आपण एक निष्ठावंत कार्यकर्ता असून पक्षाने वेळोवेळी दिलेल्या जबाबदाऱ्या आपण पार पाडल्या आहेत. तरीही आपल्याला फोंड्याची उमेदवारी का दिली नाही, यावरून कार्यकर्त्यांत संभ्रम निर्माण झाला, आणि त्या दिवशी गोंधळ झाला.

आता हा प्रश्‍न मिटला असून आपण आणि आपले समर्थक रितेश नाईक यांच्यासोबत राहणार असून पक्षाचा प्रचार करू, असे विश्‍वनाथ दळवी यांनी सांगितले. प्रदेशाध्यक्ष दामू नाईक यांच्याशी आपली चर्चा झाली होती, पण मुख्यमंत्र्यांकडे बोलणी अपेक्षित होती, ती काल झाल्याने सर्व शंकांचे निरसन झाले आहे. देश प्रथम, पक्ष द्वितीय आणि नंतर आपण असे भाजप कार्यकर्त्यांचे म्हणणे आहे, त्यानुसार आपण कार्यरत राहिलो असल्याचे विश्‍वनाथ दळवी यांनी सांगितले.

प्रचाराला प्रारंभ

फोंडा पोटनिवडणुकीतील प्रमुख उमेदवार असलेले भाजपचे रितेश नाईक, काँग्रेसचे केतन भाटीकर तसेच आपचे गितेश नाईक यांनी उमेदवारी दाखल करण्यापूर्वीच प्रचार सुरू केला आहे. त्यांनी घरोघरी संपर्कावर भर दिला असून मतदारांचा उत्स्फूर्त प्रतिसाद लाभत असल्याचे तिन्ही उमेदवारांचे मत आहे.vishwnath

भाजप, काँग्रेस, ‘आप’ भरणार अर्ज

फोंडा पोटनिवडणुकीच्या उमेदवारी दाखल करण्याच्या शेवटच्या दिवशी सोमवारी २३ रोजी तीन प्रमुख राजकीय पक्षांचे उमेदवार आपापले उमेदवारी अर्ज दाखल करणार आहेत. भाजपचे रितेश नाईक, काँग्रेसचे डॉ. केतन भाटीकर व ‘आप’चे उमेदवार गितेश नाईक आपापले अर्ज दाखल करणार आहेत. ‘आरजी’ आणि गोवा फॉरवर्डचे मौन असल्याने ते उमेदवारी दाखल करणार नाहीत, असा होरा बांधला जात आहे.

भाजपचे उमेदवार रितेश नाईक आपल्या कार्यकर्त्यांसह मिरवणुकीने सकाळी उमेदवारी दाखल करणार आहेत. खडपाबांध - फोंडा येथील रवी नाईक यांच्या कार्यालयाजवळून ही भव्य मिरवणूक निघणार आहे. भाटीकर हेही आपल्या कार्यकर्त्यांसह उमेदवारी दाखल करणार आहेत, यावेळी काँग्रेसचे नेते राजेश वेरेकर तसेच इतर कार्यकर्ते उपस्थित राहणार आहेत. ‘आप’चे गितेश नाईक हे प्रदेशाध्यक्ष वाल्मिकी नाईक तसेच इतर पदाधिकाऱ्यांना घेऊन उमेदवारी दाखल करणार असल्याचे सांगण्यात आले.