पणजी: फोंडा विधानसभा पोटनिवडणुकीसाठी अर्ज दाखल करण्याची प्रक्रिया पूर्ण झाली असून, उमेदवारांनी सादर केलेल्या प्रतिज्ञापत्रांमधून त्यांच्या मालमत्तेचा तपशील समोर आला आहे. काँग्रेसचे डॉ. केतन भाटीकर, भाजपचे रितेश नाईक आणि आम आदमी पक्षाचे गीतेश नाईक हे प्रमुख उमेदवार रिंगणात असून, तिघांपैकी सर्वात श्रीमंत उमेदवार ठरले ते डॉ. भाटिकर.

निवडणुकीसाठी सादर केलेल्या प्रतिज्ञापत्रानुसार, डॉ. केतन भाटीकर यांची एकूण मालमत्ता सुमारे ४.८८ कोटी इतकी असून, ते या तिघांमध्ये सर्वाधिक श्रीमंत उमेदवार ठरतात. त्यांच्याकडे सुमारे ३.८० कोटींची स्थावर मालमत्ता असून, जंगम मालमत्ता सुमारे १.०८ कोटी आहे.

तसेच त्यांच्यावर अंदाजे १.२८ कोटींचे कर्ज असल्याचे नमूद करण्यात आले आहे. त्यांच्या वार्षिक उत्पन्नाची नोंद सुमारे १३.२५ लाख अशी आहे. भाजपचे उमेदवार रितेश नाईक यांची एकूण मालमत्ता सुमारे १.५५ कोटी इतकी आहे. त्यांच्या प्रतिज्ञापत्रानुसार स्थावर मालमत्ता नसून बँक ठेवी, गुंतवणूक आणि दागिने अशा जंगम मालमत्तेचा त्यात समावेश आहे. त्यांचे वार्षिक उत्पन्न सुमारे १५.४६ लाख असल्याची नोंद करण्यात आली आहे.

रितेश नाईक १.५५ कोटींच्‍या मालमत्तेचे धनी

आम आदमी पक्षाचे उमेदवार गीतेश नाईक यांची एकूण मालमत्ता सुमारे ७२ लाख इतकी असल्याचे प्रतिज्ञापत्रात नमूद आहे. त्यात जंगम मालमत्ता सुमारे ५३.९७ लाख असून स्थावर मालमत्तेत प्लॉटचा समावेश आहे. तसेच त्यांच्यावर सुमारे १८.३६ लाखांचे कर्ज असल्याचेही नमूद करण्यात आले आहे. या पार्श्वभूमीवर फोंडा पोटनिवडणुकीत उमेदवारांच्या मालमत्तेची तुलना चर्चेचा विषय ठरत आहे.