पणजी: फोंडा विधानसभा मतदारसंघ पोटनिवडणुकीतील आम आदमी पक्षाचे उमेदवार गीतेश गोकुळदास नाईक यांच्याविरुद्ध तीन वर्षे जुने प्रलंबित असलेल्या चेक बाऊन्स प्रकरणात मेरशी येथील न्यायालयाने कठोर भूमिका घेत अजामीनपात्र वॉरंट जारी केले आहे.

तक्रारदार श्‍‍यामसुंदर मिरजकर यांनी ‘निगोशिएबल इन्स्ट्रुमेंट्स ॲक्ट’च्या कलम १३८ अंतर्गत ही तक्रार दाखल केली आहे. गीतेश नाईक यांचा हजेरीतून सवलत मिळवण्याचा अर्जही न्‍यायालयाने फेटाळून लावला आहे. ३० मार्च २०२६ रोजी झालेल्या सुनावणीवेळी तक्रारदारांच्या वतीने ॲड. ए. फर्नांडिस उपस्थित होते; मात्र संशयित गीतेश नाईक न्यायालयात हजर राहिले नाहीत.

याची दखल घेत न्यायालयाने तातडीने त्यांच्याविरुद्ध अजामीनपात्र वॉरंट काढण्याचे आदेश दिले. न्यायालयाच्या आदेशानुसार, कार्यवाही संपल्यानंतर दुपारी १२ वाजता संशयित आरोपीच्या वकिलांनी सवलतीचा अर्ज सादर केला; मात्र तो उशिरा सादर करण्यात आल्याने न्यायालयाने तो स्वीकारण्यास नकार दिला.

८ एप्रिल २०२४ पासून न्‍यायालयात गैरहजर

संशयित गीतेश नाईक ८ एप्रिल २०२४ पासून न्यायालयात हजर नसल्याचे नमूद करण्यात आले आहे. गैरहजेरीसाठी कोणतेही ठोस कारण अर्जात नमूद केलेले नव्हते. प्रकरण जुने असून संशयित आरोपीकडून ‘नियोजित अनुपस्थिती’ दिसून येत असल्याचे निरीक्षण नोंदवत न्यायालयाने हा कठोर निर्णय घेतला आहे. या प्रकरणाची पुढील सुनावणी ८ मे रोजी होणार आहे. त्या दिवशी गुन्ह्याचे स्वरूप वाचून दाखवण्याची प्रक्रिया पार पडणार आहे.