मडगाव : तलावात अवैधरित्या सोडलेल्या सांडपाण्यामुळे फातोर्डा परिसरातील रहिवाशांनी तीव्र नाराजी व्यक्त केली आहे. दामबाबाची तळी नावाचा तलाव रहिवासी भागाशेजारीच असून यात घाण पाणी सोडल्याने स्थानिक आक्रमक झाले आहेत. याबाबत त्यांनी तक्रारही दाखल केल्याची माहिती आहे. (Pollution of Pond in Fatorda News Updates)

फातोर्ड्यातील (Fatorda) हा तलाव खूप जुना म्हणून प्रसिद्ध आहे. मात्र सांडपाणी सोडल्याने तलावाचं विद्रुपीकरण झाल्याचा आरोप करण्यात येत आहे. प्रशासनाने तातडीने तलावामध्ये सांडपाणी सोडण्यावर कारवाई करण्याची मागणी या तक्रारीतून करण्यात आली आहे. या तलावाशेजारी असलेल्या इमारतीला अद्याप सांडपाण्याच्या पाईपलाईनचे कनेक्शन न मिळाल्याने इमारतीमधील सांडपाणी तलावात सोडलं जात असल्याचा आरोप होतो आहे.

फातोर्ड्यासारख्या परिसरात अशाप्रकारे तलावाचं (Lake) विद्रुपीकरण होत असल्याने नाराजी व्यक्त केली जात आहे. यामुळे स्थानिकांच्या आरोग्याला धोका निर्माण झाल्याचंही बोललं जात आहे. तसंच हे पाणी प्राण्यांसाठीही पिण्यायोग्य नसल्याचं बोललं जात आहे. परिसरात तलावातील सांडपाण्यामुळे दुर्गंधी पसरली असून डासांचं प्रमाण वाढल्याचा आरोपही स्थानिकांनी केला आहे. तातडीने प्रशासनाने या इमारतीच्या मालकावर कारवाई करण्याची मागणी होत आहे. गोवा राज्य प्रदूषण (Pollution) नियंत्रण मंडळाकडेही याबाबत तक्रार दाखल करण्यात येईल, असं स्थानिकांनी स्पष्ट केलं आहे.