Vijay Sardesai राज्य सरकार गोव्यातून ड्रग्सचे समूळ उच्चाटन करण्याची घोषणा करत असले तरी हैदराबाद पोलिसांनी गोव्यातील ड्रग्स व्यवहाराविषयी केलेली टिप्पणी धक्कादायक आहे. पर्यटनाच्या नावाखाली हे सरकार ड्रग्स व्यापाराला छुपा पाठिंबा देत आहे.

हे सरकार महसुलासाठी कोणत्याही थराला जाण्याची शक्यता नाकारता येत नाही. ड्रग्स व्यापारामध्ये राजकारणी व गुन्हेगारांचे लागेबांधे असल्याचा आरोप गोवा फॉरवर्डचे आमदार विजय सरदेसाई यांनी केला.

पणजीतील पत्रकार परिषदेत आमदार सरदेसाई म्हणाले की, हैदराबादचे पोलिस आयुक्त सी. व्ही. आनंद यांनी गोव्यातील ड्रग्स व्यवहाराची पोलखोल केली आहे. त्यांनी सरकार व ड्रग्स दलाल यांच्यातील लागेबांधे उघड करताना गोव्यातील सरकार त्यांना कधीच सहकार्य करत नाही.

ड्रग्सविरोधात कारवाई केली तर त्याचा राज्यातील पर्यटनावर परिणाम होईल, असे सांगण्यात आले, ही स्थिती भयावह आहे.

विरोधकांचे काम हलके

व्यावसायिकांकडून खंडणी वसूल केली जाते, असे सत्ताधारी पक्षाचे आमदार मायकल लोबो म्हणतात, हे कशाचे द्योतक आहे, असा सवाल सरदेसाई यांनी केला. सध्या भाजपमध्ये इतके आमदार बाहेरून घेतले आहेत की, विरोधकांची भूमिका तेच निभावत आहेत. त्यामुळे विरोधकांचे काम हलके झाले आहे, असा टोमणाही सरदेसाई यांनी यावेळी हाणला.

...असा होतो फाईलचा प्रवास

• 2020 साली गोव्यात गांजा कायदेशीर करण्याच्या हालचालींचा पर्दाफाश केला होता.

• त्यानंतर मुख्यमंत्री डॉ. प्रमोद सावंत यांनी जानेवारी २०२१ मध्ये हा प्रस्ताव रद्द केल्याचे उत्तर विधानसभेत दिले होते.

• सप्टेंबर 2022 मध्ये आरोग्य विभागाला ‘आरटीआय’नुसार पत्र पाठवले, तेव्हा उत्तर मिळाले की, या प्रकरणाची फाईल सल्ल्यासाठी कायदा विभागाकडे आहे.

• कायदा विभागाकडे आरटीआय अर्ज दाखल केला तेव्हा उत्तर मिळाले की, ही फाईल विचारार्थ प्रलंबित आहे.

• गोवा फॉरवर्डने आरोग्य आणि कायदा विभागाच्या सचिवांना पत्र लिहिले, तेव्हा दोघांनीही उत्तर न देणे पसंत केले, अशी माहिती आमदार सरदेसाई यांनी दिली.