Goa Carnival 2023: येथील किनारी भागात विदेशी पर्यटक कार्निव्हल मूडमध्ये असल्याचे पाहून, विनापरवाना पर्यायी कार्निव्हल सुरू करण्याचा जुजू (जर्मनी) याचा आणि त्याच्या सहकाऱ्यांचा प्रयत्न पेडणे पोलिस निरीक्षक दत्ताराम राऊत व सहकाऱ्यांनी हाणून पाडला.

या कारवाईत म्होरक्या जुजू (जर्मनी) यास रेस्टॉरंटच्या तीन कर्मचाऱ्यांसह पोलिसांनी 'वॅटस् इन' रेस्टॉरंटमधून ताब्यात घेतले. 20 वर्षांनंतर अशी कारवाई झाल्याने स्थानिकांनी समाधान व्यक्त केले आहे.

दरम्यान, पोलिसांच्या या कारवाईमुळे स्थानिकांनी समाधान व्यक्त केले तसेच किनाऱ्यारील लमाणींचा वावर वाढला असून, पर्यटकांना धमकावून व्यवहार केले जात असल्याने कारवाईची अपेक्षा स्थानिक बाळगून आहेत.

सदर कार्निव्हल 3 वाजता सुरू होणार असल्याची माहिती सर्वत्र पसरल्याने विदेशी पर्यटकांनी ये-जा सुरू केली होती. मात्र, परवाना न मिळाल्याने काहींनी मोरजी भागात जाण्याचे ठरवले तर काहींनी हरमलात थांबणे पसंत केले. यावेळी रेस्टॉरंटसमोर मोठाले पक्षी, गरुड व फुले तसेच विविध वस्तू केल्या होत्या. या कारवाईमुळे पर्यटकांचा हिरमोड झाला.

पोलिसांना गृहीच धरु नये!

राज्य सरकारचा कार्निव्हल मोरजीत चालू असून त्यास पर्यायी कार्निव्हल हरमलमध्ये घेणे कायद्याचे उल्लंघन असून उशिरा सुरू करण्याचा प्रयत्न केल्यास काळजी म्हणून जुजू (जर्मनी) यास ताब्यात घेतल्याचे पोलिस निरीक्षक राऊत यांनी सांगितले.

यावेळी रेस्टॉरंटबाहेर मोठा थाट केला होता व त्यांचा सुगावा लागल्याने कारवाई केल्याचे पोलिस निरीक्षक राऊत यांनी सांगितले. दरम्यान, विदेशी पर्यटकांना पाठिंबा देणाऱ्या मंडळींनी पोलिसांना गृहित धरू नये, स्थानिकांच्या पाठिंब्यामुळे विदेशी शेफारले असून, पोलिसांना पाठिंबा द्यावा, असे आवाहन निरीक्षक राऊत यांनी केले.