थिवी: राज्यात गेल्या काही दिवसांपासून मुसळधार सरी बरसत असून सरकारने धबधबे, चिरेखाणी येथे आंघोळीसाठी बंदी घातली आहे. याचदरम्यान, एक धक्कादायक घटना समोर आली आहे. मित्रांसमवेत थिवीतील पठारावर सहलीसाठी गेलेल्या पर्वरी पोलिस ठाण्यातील एका कॉन्स्टेबलचा खाण खंदकात बुडून मृत्यू झाला. आकाश नाईक असे या पोलिस कॉन्स्टेबलचे नाव आहे.

काय आहे नेमकं प्रकरण?

आकाश नाईक (वय, वर्ष 35)आपल्या मित्रांसमवेत मौजमजा करण्यासाठी सिरसई येथील कोणशे येथे पोहोचले होते. यादरम्यान नाईक पावसाच्या पाण्याने भरलेल्या एका विहीर वजा खंदकात पोहोण्यासाठी उतरले असता खंदकाच्या खोलीचा अंदाज न आल्याने ते बुडाले. कोलवाळ पोलिस स्थानकाला संध्याकाळी 6.45 वाजता माहिती मिळताच उप निरीक्षक संतोष जाधव आपल्या सहकाऱ्यांसोबत घटनास्थळी पोहोचले. अग्निशमनदल आणि पोलिसांच्या मदतीने आकाश यांना पाण्याबाहेर काढून तात्काळ म्हापसा येथील जिल्हा रुग्णालयात नेण्यात आले. मात्र डॉक्टरांनी नाईक यांचा मृत्यू झाल्याचे सांगितले.

नाईक विवाहित होते

कोलवाळ पोलीस स्थानकाचे पोलीस उप निरीक्षक संतोष जाधव यांनी घटनेचा पंचनामा करुन मृतदेह पोस्टमोर्टमसाठी बांबोळी येथे पाठवला आहे. कॉन्स्टेबल नाईक हे विवाहित असून त्यांना दोन मुले आहेत. सद्या ते पर्वरी पोलीस स्थानकावर कॉन्स्टेबल म्हणून कार्यरत होते. हल्लीच पर्वरीतून कळंगुट‌ पोलिस स्थानकात त्यांच्या बदलीचा आदेश काढण्यात आला होता.