Drunk and Drive बेशिस्त पद्धतीने वाहन चालवणे, ट्राफिक नियमांचा भंग करणे अशा कारणास्तव गोव्यात रस्ते अपघातांचे प्रमाण वाढत आहे. त्यामुळेच गोव्यातील रस्ते वाहतूक सुरक्षित आणि नियमात रहावी म्हणून गोवा पोलीस सतर्क असून नियमबाह्य कृती करणाऱ्यांवर ते कायदेशीर कारवाई करत आहेत.

त्यातच गोव्यात सध्या पर्यटन हंगामाला सुरुवात झाली आहे. काही पर्यटक गोव्यात पर्यटनाच्या नावाखाली अक्षरशः धिंगाणा घालतानाही दिसतात. अशा बेशिस्त पर्यटकांवर पोलीस कारवाईचा बडगा उगारत आहेत.

नुकतेच गोव्यातील कळंगुट या ठिकाणी मद्यपान करून वाहन चालवल्याबद्दल वाहतूक पोलिसांनी आंध्र प्रदेशातील पर्यटकांना दंड ठोठावला आहे. दरम्यान काल एका घटनेत एक युवक चालत्या चारचाकीच्या बॉनेटवर बसून प्रवास करत असल्याचा व्हिडीओ सोशल मीडियावर व्हायरल झाला होता. या सगळ्या प्रकारानंतर वाहतूक पोलिसांनी वाहतूक नियमांची पायमल्ली करणाऱ्यांवर कठोर कारवाई करण्याचे ठरवले आहे.

गोव्यातील वाढत्या अपघातांवर आळा घालण्यासाठी वाहतूक पोलीस प्रशासन आणि सरकार सदैव तत्पर आहे. यासाठी वाहतूक नियमांमध्ये मोठ्या प्रमाणात बदल करण्यात आले. वाहतूक परवाना, इन्शुरन्स, हेल्मेट या सर्व गोष्टी वाहनचालकांसाठी सक्तीच्या करण्यात आल्या असून, यापैकी कोणतीही गोष्ट नसल्यात चालकांना दंड आकारण्यास सुरुवात देखील केली आहे.