Goa : करासवाडा येथे अस्नोडा जलशुद्धीकरण केंद्रातून येणारी 1000 एमएमची मुख्य जलवाहिनी भूमिगत वीज केबल टाकण्याच्या कामामुळे फुटली. ही जलवाहिनी म्हापसा, पर्वरी, कोलवाळ आणि तालुक्यातील इतर भागांत पाणीपुरवठा करते.

मिळालेल्या माहितीनुसार, रविवारी म्हापसा येथे सुरू असलेल्या भूमिगत वीज केबल टाकण्याच्या कामामुळे 350 एमएम जलवाहिनी खराब झाली. या बिघडलेल्या जलवाहिनीची दखल घेत जल विभागाने कारवाई केली आणि 350 एमएम वाहिनीच्या दुरुस्तीचे काम हाती घेतले. त्यावेळी समजले की, 1000 एमएम जलवाहिनी देखील खराब झाली आहे. कारण, दोन्ही जलवाहिन्या या एकमेकांच्या अगदी जवळ आहेत.

पाणीपुरवठा पूर्ववत करण्यासाठी युद्धपातळीवर या जलवाहिनीच्या दुरुस्तीचे काम सुरू केले. साबांखाच्या वरिष्ठ अधिकाऱ्‍यांनी सांगितले की, आम्ही नादुरुस्त झालेल्या जलवाहिनीचे काम हाती घेतले आहे.

बार्देश, डिचोलीत मर्यादित पाणी

करासवाडा येथे मुख्य जलवाहिनी फुटल्याने तिची दुरुस्ती करण्यात येत असून या प्रकारामुळे 24 ऑगस्ट व 25 ऑगस्ट रोजी संपूर्ण बार्देश तालुका आणि डिचोली तालुक्याच्या काही भागांना मर्यादित पाणीपुरवठा करणार असल्याची माहिती पाणीपुरवठा विभागाने कळविले आहे.