Goa Tradition :

डिचोली, अग्निदिव्य आदी पारंपरिक कार्यक्रम आणि शेकडो भक्तगणांच्या साक्षीत पिळगावची ग्रामदेवता श्री शांतादुर्गा देवीचा वार्षिक कळसोत्सव मोठ्या भक्तिभावाने उत्साहात साजरा करण्यात आला.

सलग तीन दिवस साजरा करण्यात आलेल्या कळसोत्सवाची आज (शुक्रवारी) पहाटे सांगता झाली.

पिळगाव येथील कळसोत्सवाला शेकडो वर्षांची परंपरा आहे. गुढी पाडव्याच्या दिवशी कळसोत्सवाला प्रारंभ झाला होता. तीन दिवस श्री देवी शांतादुर्गेचा कळस घरोघरी नेण्यात आला. गावकर मंडळी कळस घेऊन ग्रामस्थांच्या घरात गेल्यानंतर प्रत्येक ठिकाणी कळसाचे विधिवत पूजन आदी सेवा करण्यात आली. सुवासिनींतर्फे देवीची ओटी भरण्यात आली.

पूर्वीच्या काळी गुढी पाडव्याच्या दिवशीच हा कळसोत्सव साजरा करण्यात येत असे. मात्र, लोकवस्ती वाढल्यामुळे गेल्या काही वर्षांपासून हा उत्सव तीन दिवस साजरा करण्यात येत आहे.

गुरुवारी (ता. ११) गिमोणे येथील प्रभू श्री रामचंद्र मंदिर, पांडवकालीन चंद्र-सूर्य प्रतिमा कोरलेल्या पाषाणावर विधिवत पूजन झाल्यानंतर रात्री उशिरा पारंपरिक वाटेने कलशाचे मंदिराकडे आगमन झाले. कळसोत्सवानिमित्त दशावतारी नाट्यप्रयोग सादर करण्यात आला.

भाविकांनी अनुभवला अग्निदिव्याचा थरार

मध्यरात्री एक वाजता पारंपरिक पद्धतीने होमकुंड पेटविण्यात आले. नंतर व्रतस्थ धोंड, भक्तगण पवित्र तळीवर शुचिर्भूत होऊन आल्यानंतर मध्यरात्री तीन वाजता होमकुंड उत्सव साजरा करण्यात आला.

''श्री शांतादुर्गा माता की जय'', ''पुंडलिक वर दे हरी विठ्ठल'' आदी जयघोष करीत भक्तगणांसह कलशधारी अवसारी मोडाने नाचत अग्निदिव्य केले. पहाटे पारंपरिक पद्धतीने कौलोत्सव होऊन या उत्सवाची सांगता झाली. अग्निदिव्याची अनुभूती घेण्यासाठी होमकुंडस्थळी आबालवृद्धांनी गर्दी केली होती.