मडगाव : आपल्या मंत्रिपदाचा आणि आमदारकीचा राजीनामा देण्याची तयारी केलेले जलस्त्रोत मंत्री फिलिप नेरी रॉड्रिग्स यांनी शेवटी दिवसभरातच आपला निर्णय बदलला आहे. राजीनामा द्यायचा की नाही हा निर्णय आपण आपल्या समर्थकांना विचारुन नंतरच घेणार, असे रॉड्रिग्स यांनी सांगितले. (Philip Neri Rodrigues News Updates)

रॉड्रिग्स यांच्याच बरोबर काँग्रेस सोडून भाजपात (BJP) गेलेले विल्फ्रेड (बाबाशान) डीसा यांनी मात्र भाजप सदस्यत्वाचा राजीनामा देऊन येणारी निवडणूक अपक्ष म्हणून लढविण्याचा निर्णय घेतला आहे.

आज सकाळी रॉड्रिग्स (Philip Neri Rodrigues) हे आपल्या पक्षाचा राजीनामा देणार आणि नंतर तृणमुल पक्षात प्रवेश करणार असे वृत्त पसरले होते. त्यानंतर रोड्रिग्स यांच्याशी संपर्क साधला असता आपण राजीनामा द्यायचा निर्णय घेतला आहे मात्र कोणत्या पक्षात सामील व्हायचे हा निर्णय अद्याप घेतलेला नाही असे त्यांनी सांगितले होते.

रॉड्रिग्ज यांनी सायंकाळी मात्र आपला विचार बदलत राजीनामा द्यायचा निर्णय रद्द केला. आपल्या कार्यकर्त्याना विश्वासात घेऊनच आपण काय तो अंतिम निर्णय घेईन, असे स्पष्ट केले आहे.

दरम्यान, नुवेचे आमदार बाबाशान डीसा याना विचारले असता, आपण आमदारकीचा राजीनामा द्यायचे ठरविले आहे. आगामी निवडणूक (Goa Assembly Elections) आपण अपक्ष म्हणून लढवावी अशी आपल्या कार्यकर्त्यांची इच्छा आहे असे ते म्हणाले.