पेडणे: माजी आमदार बाबू आजगांवकरांनी अगामी विधानसभा निवडणुकीसाठी दंड थोपटले आहेत. पेडण्यातील कायदा आणि सुव्यवस्था बिघडल्याचे म्हणत आजगांवकरांनी विद्यमान आमदार गांजा विकणारा माणूस असल्याची बोचरी टीका त्यांनी केली. तसेच, २०२७ ची विधानसभा निवडणूक लढणार असल्याचे त्यांनी पुन्हा एकदा स्पष्ट केले. आजगांवकरांच्या या टीकेला प्रवीण आर्लेकरांनी देखील जोरदार प्रत्युत्तर दिले.

पेडण्यात झालेल्या असिड हल्ला प्रकरणावरुन बाबू आजगांवकरांनी प्रवीण आर्लेकरांवर टीका केली. “यापूर्वी पेडण्यात अशी घटना घडली नसल्याचे आजगावकर म्हणाले. पेडण्यातील कायदा आणि सुव्यवस्था पूर्णपणे कोलमडली आहे. आमदारांचे लक्ष मतदारसंघावर नाही, ते या परिस्थितीला जबाबदार आहेत. नागरिकांमध्ये पोलिसांचे भय नाही. विद्यमान आमदाराने या गोष्टी मतदारसंघात आणल्या, त्यांचा इतिहास तपासून पहावा, गांजा विक्री करणारा माणूस आमदार आहे,” अशी टीका आजगावकरांनी केली.

तसेच, अगामी २०२७ सालची विधानसभा निवडणूक शंभर टक्के लढणार असल्याचे त्यांनी स्पष्ट केले. मी चारवेळा या पेडण्यातून निवडून आलो आहे. मी मतदारसंघातील अन्यायकारक गोष्टींविरोधात आवाज उठवून पेडण्यात पुन्हा पहिल्यासारखा विकास करेन, असेही आजगावकर म्हणाले.

आजगावकरांच्या टीकेला आमदार प्रवीण आर्लेकरांनी देखील जोरदार प्रत्युत्तर दिले आहे. आजगावकरांचा मुलगाच डिस्कोत गांजा विकतो असा गंभीर आरोप त्यांनी केला. तसेच, कायदा आणि सुव्यवस्थेवर भाष्य करणाऱ्या आजगावकरांचे डोके फिरलंय असं दिसतं, असे आर्लेकर म्हणाले. आजगावकर २०२७ ची निवडणूक लढणार असतील तर त्याने मला काहीच अडचण नाही, असेही आर्लेकर म्हणाले.