No parking in Bicholim: पार्किंग समस्येने ग्रासलेल्या डिचोली शहरात ''ट्रॅफिक जाम''चे प्रकार नित्याचेच घडले आहेत. चतुर्थीच्या तोंडावर सध्या शहरात खास करुन बाजारात ही समस्या वाढली असून, चतुर्थीच्या बाजारावेळी ही समस्या नियंत्रणात आणताना वाहतूक पोलिसांसह पालिकेलाही कसरत करावी लागणार आहे. अशीच चिन्हे सध्या दिसून येत आहे. सध्या प्रामुख्याने बाजारात ही समस्या अधिक आहे.

दरवर्षी चतुर्थीच्या आधी दोन दिवस म्हणजेच माटोळी बाजार भरतो, त्यावेळी बाजारात वाहनांना प्रवेशबंदी करण्यात येते. चतुर्थी बाजारातील गर्दीमुळे बाजारात समस्या निर्माण होऊ नये, म्हणून वाहतूक पोलिसांच्या सहकार्याने पालिकेतर्फे ही उपाययोजना करण्यात येते. यंदाही ही उपाययोजना करण्यात येणार असली, तरी सध्याची स्थिती पाहता चतुर्थीकाळात बाजाराबाहेर मोठ्या प्रमाणात वाहतुकीची समस्या उद्‍भवण्‍याची शक्यता आहे. चतुर्थीच्या बाजारा काळात वाहतूक पोलिस तैनात करावे, अशी स्थानिकांची मागणी आहे.

बेशिस्त पार्किंग : शहरातील काही जागा पालिकेने पार्किंगसाठी आरक्षित केल्या आहेत. तरीदेखील बेशिस्त पार्किंगचे प्रकार वाढले आहेत. शहरातील सरकारी शाळेसमोरील रस्ता तसेच न्यायालय इमारतीकडून बाजारात जाणाऱ्या रस्त्यावर तर ही समस्या नित्याचीच झाली आहे. बेशिस्त पार्किंगमुळे अधूनमधून शहरात विविध ठराविक भागात वाहतूक कोंडीचे प्रकार घडत आहेत. न्यायालयाकडून बाजारात जाणाऱ्या रस्त्यावर हटकून वाहतूक कोंडी होत असते. रात्रीच्यावेळी तर बराचवेळ वाहतूक खोळंबून राहते. वाहतूक विभागाचे पोलिस अधूनमधून बेशिस्तपणे पार्किंग करणाऱ्या वाहनांविरोधात कारवाई करतात. मात्र त्यांचे दुर्लक्ष झाले, की बेशिस्त पार्किंगचे प्रकार घडतात.