पणजी: गोव्याची राजधानी म्हणून मिरवणारे पणजी शहर आपली ओळख गमावत आहे. हिरवाईने नटलेल्या या शहरातील हिरवाई कुठेतरी कमी होताताना दिसत आहे. ओरेम खाडीच्या काठावर असलेल्या जुन्या पट्टो ब्रिजपासून फूट ब्रिजपर्यंत पसरलेली हिरवीगार बाग, जैवविविधतेने भरलेली विविध प्रकारची झाडे अगदी आजही साद घालतात. मात्र, पणजी शहराच्या हिरवाईने नटलेल्या या सैंदर्याला सिमेंटच्या जंगलाचे गालबोट लागत आहे. (Panjim city is losing its natural charm due to new constructions)

दरम्यान, रात्रीच्या वेळी या ठीकाणी काजवे पाहायला मिळत आहेत, जे पणजी (Panjim) शहरात दुर्मिळ आहेत. मात्र, हे उद्यान उद्ध्वस्त झाले असून, पर्यटक मनोरंजन केंद्राच्या नावाखाली नवनवीन बांधकामे या ठिकाणी सुरू आहेत. रात्रीच्या वेळी पणजीमधली चकाकी असणारी ही बाग पर्यटकांसाठी मोठे आकर्षण ठरू शकली असती.

पोर्तुगीज काळात मांडोवी नदीच्या (Mandovi River) पाण्याखाली असलेला हा हिरवागार प्रदेश आणि क्रीडा विभागाची सरकारी मालमत्ता म्हणून पणजीकरांनी एवढी वर्षे गृहीत धरलेली ही हिरवीगार जागा अचानक खासगी मालमत्ता कशी बनते, याचे आश्चर्य आहे. पणजीची भावी पिढी आता या सुंदर जागेला नक्कीच मुकणार आहे.