पणजी: गेल्या काही दिवसांपासून गोव्यात उन्हाचा तडाखा वाढला असून दुपारनंतर बाहेर फिरताना नागरिकांना घामाच्या धारा लागत आहेत. वाढता उकाडा नागरिकांसाठी त्रासदायक ठरत आहे. मार्चच्या मध्यापर्यंत जाणवणारे तीव्र उन्हाचे चटके यंदा फेब्रुवारीतच जाणवू लागल्यानं गोवेकर हैराण झाले आहेत.

राज्यात वाढत्या उष्णतेमुळे नागरिक त्रस्त झाले असून, उष्णतेपासून बचावासाठी एसी, कूलर आणि पंख्यांची मागणी मोठ्या प्रमाणात वाढली आहे. दरम्यान, राज्यातील वीज वापर दरवर्षी १० टक्क्यांनी वाढत असल्याचं एका आकडेवारीतून समोर आलंय.

उष्णतेमुळे एसी, कूलर आणि पंख्यांचा मोठ्या प्रमाणावर वापर होत आहे. विजेची वाढती मागणी पुरवणे हे विजखात्यासाठी आव्हानात्मक ठरत आहे. त्यामुळे काही भागांत गेल्या काही दिवसांपासून अनियमित वीजपुरवठा होत असून, नागरिकांना याचा फटका बसत आहे. वीज खंडित होण्याच्या तक्रारीत देखील वाढ झाली आहे. 

राज्यात वाढत्या उष्णतेमुळे विजेची मागणी झपाट्याने वाढत आहे. गेल्या वर्षी विजेची मागणी ८५० मेगावॉट इतकी होती. मात्र, यंदाच्या तीव्र उष्णतेमुळे आणि एसी, कूलर व अन्य विद्युत उपकरणांच्या वाढत्या वापरामुळे आगामी काळात विजेची मागणी आणखी १० टक्क्यांनी वाढण्याची शक्यता आहे.

जर ही वाढती मागणी पूर्ण करण्यासाठी योग्य नियोजन केलं नाही, तर विजखात्याचा ताण अधिक वाढू शकतो आणि अनियमित वीजपुरवठ्याची समस्या निर्माण होऊ शकते.