Panaji Traffic Issue : काकोड्यातील रस्ते खोदलेले आहेत,त्यामुळे वाहतूक कोंडीच्या घटना आता काकोडा भागात नेहमी होऊ लागल्या आहेत. दिवसभरात वारंवार वाहतूक ठप्प होत असल्याने यातून दुचाकीही सुटू शकत नाही अशी स्थिती निर्माण होत असल्याने नागरिकांतून संताप व्यक्त होत आहे.

मुख्य रस्त्यांवरील खोदकाम आता काकोडा भागात पोहचल्याने वाहतुकीचा खोळंबा होऊ लागला आहे. काकोडा, शेळपे औद्योगिक वसाहतीला जाणारी अवजड वाहतूक, खडी, चिरे, वाहतूक करणारी वाहने त्यात प्रवासी बस वाहतूक, चारचाकी वाहनाच्या दोन्हीही बाजूने मोठमोठ्या रांगा लागत असतात.

दुचाकीही सुटू शकत नाही, अशी परिस्थिती निर्माण होत असल्यामुळे वाहन चालकांची एकमेकांविरुद्ध शाब्दिक चकमक घडताना दिसते. वाहतूक सुरळीत करण्यासाठी वाहतूक पोलिस किंवा बांधकाम कंत्राटदाराने माणसे नेमून अडथळा होणार नाही, याची काळजी घेणे आवश्यक आहे.

वाहतूक पोलिसांनी लक्ष घालावे !

मुख्य रस्ता वाहतुकीला अडसर वाटू लागल्यास चारचाकी, दुचाकी वाहन चालक बगल रस्त्याच्या दिशेने धाव घेतात. पण तिथेसुद्धा रस्त्याची तोडफोड झाल्यामुळे वाहतुकीचा खोळंबा झालेला असतो. अशा परिस्थितीत रूग्णवाहिका अडकल्यास रुग्ण दगावण्याची भीती व्यक्त केली जात आहे. हीच परिस्थिती अजून किमान पंधरा दिवस राहणार असल्यामुळे वाहतूक पोलिसांनी यात लक्ष घालावे,अशी मागणी होत आहे.