Panaji police station attack : पणजी पोलिस स्थानकावर केलेल्या हल्लाप्रकरणी सुरू असलेल्या सुनावणीस कायमस्वरूपी गैरहजर राहण्याची परवानगी द्यावी, अशी मागणी करणारा अर्ज शुक्रवारी या प्रकरणातील मुख्य आरोपी असलेले महसूलमंत्री बाबूश मोन्सेरात आणि त्यांची पत्नी आमदार जेनिफर मोन्सेरात यांनी दक्षिण गोव्याचे प्रधान सत्र न्यायाधीश इर्शाद आगा यांच्यासमोर केली.

या प्रकरणाची सुनावणी पुढील शुक्रवारी होणार असून त्यावेळी या मागणीवर न्यायालय निकाल देणार आहे. आजच्या सुनावणीस जेनिफर मोन्सेरात हजर होत्या; पण बाबूश गैरहजर होते.

सुदेश नाईक यांनी आजच्या सुनावणीवेळी उदय मडकईकर, दयानंद कारापूरकर, कॅरोलिना पो यांच्यासह एकूण आठ संशयितांची ओळख पटवली.

गुदिन्होप्रकरणी ब्रागांझांची साक्ष

काही कारखान्यांना बेकायदा वीज बिलात सवलत देऊन ४.५० कोटींचा घोटाळा केल्याचा आरोप असलेले तत्कालीन वीजमंत्री तथा विद्यमान पंचायतमंत्री माविन गुदिन्हो यांच्याविरोधात सुरू असलेल्या खटल्याची सुनावणी न्या. आगा यांच्यासमोर सुरू असून या प्रकरणातील साक्षीदार अरुण ब्रागांझा यांची उलटतपासणी पूर्ण झाल्याने त्यांची साक्ष पूर्ण झाली.