पणजी: इन्स्टाग्रामवरून मैत्री करून १७ वर्षीय अल्पवयीन मुलीवर अत्याचार केल्याप्रकरणी अटकेत असलेल्या प्रथमेश वेर्णेकरचा जामीन अर्ज पणजी येथील ''फास्ट ट्रॅक स्पेशल कोर्ट''ने (पॉक्सो) फेटाळून लावला आहे. कथित अत्याचाराचे गांभीर्य आणि प्रकरणाची संवेदनशीलता पाहता, या टप्प्यावर जामीन देणे ''घाईचे'' ठरेल, असे निरीक्षण विशेष न्यायाधीश डॉ. पूजा कवळेकर यांनी नोंदवले.

पीडित मुलीने दिलेल्या तक्रारीनुसार, तिची आणि आरोपीची इन्स्टाग्रामवर ओळख झाली होती. ९ मार्च २०२६ रोजी तिने आरोपीला पणजी मार्केटजवळ भेटण्याचे ठरवले. यावेळी आरोपीने तिला चहा पाजण्याच्या बहाण्याने आपल्या दुचाकीवरून म्हापसा येथे नेले. म्हापसा येथील एका हॉटेलमध्ये मुलीला नेऊन तिच्या इच्छेविरुद्ध अत्याचार केल्याचा आरोप आहे.

त्यानंतर त्याने तिला पुन्हा पणजी बसस्थानकावर सोडून दिले. पीडितेने या प्रकाराची माहिती आपल्या वडिलांना दिली, त्यानंतर उत्तर गोवा महिला पोलीस स्थानकात ११ मार्च २०२६ रोजी गुन्हा दाखल करण्यात आला. आरोपीवर भारतीय न्याय संहिता कलम ६४ आणि पॉक्सो कायद्याच्या कलम ४ अंतर्गत गुन्हा दाखल करण्यात आला आहे.

या प्रकरणात आरोपीची ओळख संशयास्पद आहे. पीडितेने कलम १८३ बीएनएसएस अंतर्गत दिलेल्या जबाबात ''हर्षद'' नावाच्या मुलाचा उल्लेख केल्याचा युक्तिवाद आरोपीतर्फे करण्यात आला होता. न्यायालयाने नमूद केले की, हॉटेलच्या रजिस्टरमध्ये आरोपी आणि पीडिता दोघांच्याही नावांची नोंद आहे, ज्यामुळे ते दोघेही त्या ठिकाणी एकत्र उपस्थित होते हे सिद्ध होते.