पणजी: पणजी महानगरपालिकेने मासळी मार्केटजवळील जीर्ण इमारत पाडण्यासाठी मासळी विक्रेत्यांचे धेंपो हाऊसशेजारी पार्किंगमध्ये मंडप घालून व्यवसायासाठी स्थलांतर केले होते. या मंडपासाठी सुमारे साडेचार महिन्यांसाठी महानगरपालिकेने ५० लाख रुपयांचे भाडे मोजले आहे. त्या खर्चाला शुक्रवार, २० रोजी होणाऱ्या बैठकीत मंजुरी घेतली जाणार आहे.

लोखंडी खांब, पत्रे आणि बांबू लावून उभारलेले तात्पुरत्या शेडसाठी महानगरपालिकेने तीन टप्प्यांत भाडे मोजले आहे. सुरुवातीला २३ दिवसांसाठी मंडपाचे भाडे १८ टक्के जीएसटीसह मंडपधारकाने ९ लाख ४६ हजार ६४३ रुपये घेतले आहेत.

त्याशिवाय या मंडपवाल्याला मुदतवाढ दिली गेली. ही मुदतवाढ २५ दिवसांची राहिली. त्यासाठी महानगरपालिकेला बिलापोटी १० लाख २८ हजार ९६० रुपये मोजावे लागले.

बाजूला उभारल्या जाणाऱ्या शेडचे काम पूर्ण न झाल्याने मंडपवाल्याला पुन्हा मुदतवाढ मिळाली. ही मुदतवाढ ९० दिवसांची राहिली.

त्यामुळे मंडपवाल्याने बिलातून महानगरपालिकेला २० टक्के सूट दिली आणि बिल २० लाख ६३ हजार ४०५ रुपये एवढे दिले. म्हणजेच सुमारे साडेचार महिन्यांसाठी महानगरपालिकेला हा मंडप ४९ लाख ३९ हजार ८ रुपयांना पडला. या सर्वांत १८ टक्के जीएसटीचा समावेसश आहेच.

तर लाखो वाचले असते!

विशेष बाब म्हणजे एवढी मोठी रक्कम मोजण्याऐवजी स्वतः खर्च करून महानगरपालिकेने मंडप उभारला असता तर तो त्यांना परवडला असता आणि कायमस्वरूपी वस्तूही महानगरपालिकेकडे राहिल्या असत्या. त्यातून लाखो रुपये महानगरपालिकेचे वाचले असते. या बाबी जर-तरच्या; परंतु या सर्वातून मंडपवाला मात्र मालामाल झाला आहे. उद्या, शुक्रवारी होणाऱ्या बैठकीत या खर्चाला कोणी आक्षेप घेण्याचे कारण नाही, जरी घेतला तरी त्यावर पुढे काय होणार, हे सर्वांनाच माहीत आहे.