पणजी: पणजी महानगरपालिकेच्या कार्यक्षेत्रात राहणाऱ्या भाडेकरूंना मुलांच्या शिक्षणासाठी आवश्यक असलेला उत्पन्नाचा दाखला मिळविताना सध्या अडचणींचा सामना करावा लागत आहे. घरमालकांनी घरपट्टी थकविल्याने आवश्यक असलेले घरपट्टी भरण्याचे प्रमाणपत्र भाडेकरूंना सादर करता येत नसल्याने त्यांना उत्पन्नाचा दाखला मिळविण्यासाठी तारेवरची कसरत करावी लागत आहे.

पणजी शहर परिसरात परराज्यातील अनेक कुटुंबे भाड्याच्या घरात राहत आहेत. त्यांच्या मुलांचे महाविद्यालयीन शिक्षण सुरू असून, विविध शैक्षणिक सवलती किंवा योजनांसाठी महाविद्यालय व्यवस्थापनाकडे उत्पन्नाचा दाखला सादर करणे आवश्यक असते. हा दाखला मिळविण्यासाठी महानगरपालिकेकडे अर्ज करताना फ्लॅटमालक अथवा घरमालकाने घरपट्टी भरल्याचे प्रमाणपत्र जोडणे आवश्यक असल्याचे सांगितले जात आहे.

घरमालकांनी अनेक महिन्यांपासून घरपट्टी भरलेली नसल्यास त्याचा थेट परिणाम भाडेकरूंवर होत आहे. काही घरमालकांकडून हजारो रुपयांचे नियमित भाडे घेतले जात असतानाही घरपट्टी भरण्याकडे दुर्लक्ष केले जाते. परिणामी, भाडेकरूंना आवश्यक कागदपत्रे मिळविण्यासाठी घरमालकांकडे विनंती करावी लागत आहे.

महानगरपालिकेच्या दृष्टीने घरपट्टी नियमितपणे भरणे ही घरमालकांची जबाबदारी आहे.

शिक्षणासाठी कागदपत्रांची गरज

मुलांच्या महाविद्यालयीन शिक्षणासाठी उत्पन्नाचा दाखला आवश्यक असलेल्या कुटुंबांना घरमालकांच्या थकीत घरपट्टीचा फटका बसत आहे. त्यामुळे घरपट्टी थकविणाऱ्या घरमालकांमुळे भाडेकरूंना शैक्षणिक प्रक्रियेत अडथळे निर्माण होऊ नयेत, यासाठी महानगरपालिकेने पर्यायी उपाययोजना करावी, अशी मागणी पुढे येत आहे.