पणजी: जुन्या मांडवी पुलावर २२ ऑगस्ट २०२४ रोजी झालेल्या भीषण अपघातातील मुख्य संशयित संकेत शेट (मडकई) याच्यावर भारतीय न्याय संहितेच्या कलम १०५ अन्वये ''सदोष मनुष्यवधाचे'' आरोप निश्चित करण्याचा आदेश उत्तर गोवा अतिरिक्त सत्र न्यायालयाने दिला आहे. मद्यधुंद अवस्थेत अतिवेगाने गाडी चालवून एका कामगाराचा जीव घेतल्याचा त्याच्यावर आरोप आहे.

संशयित शेट याने आपली कार मद्यधुंद अवस्थेत चालवत जुन्या मांडवी पुलावर रस्ता दुरुस्ती करणाऱ्या कामगारांना आणि ''जेट पॅचर'' मशीनला जोरदार धडक दिली होती. या अपघातात तिघे कामगार गंभीर जखमी झाले होते, तर २४ वर्षीय युवकाचा उपचारादरम्यान गोवा वैद्यकीय महाविद्यालयात मृत्यू झाला होता.

सुनावणी दरम्यान बचाव पक्षाने असा दावा केला होता की, संशयिताचा कोणालाही मारण्याचा हेतू नव्हता, त्यामुळे त्याच्यावर कलम १०५ ऐवजी कलम १०६ लावण्यात यावे. मात्र, अतिरिक्त सत्र न्यायाधीश विजया आंब्रे यांनी हा युक्तिवाद फेटाळला.

पुलावर वेग मर्यादा ३० किमी/तास असताना गाडी अतिवेगात होती, आरोपी दारूच्या नशेत गाडी चालवत होता आणि अशा स्थितीत गाडी चालवल्यास कोणाचा तरी मृत्यू होऊ शकतो, याची ''जाणीव'' संशयिताला असणे अपेक्षित आहे या बाबी लक्षात घेऊन न्यायालयाने आरोप निश्चित केले.

न्यायालयाने संशयितावर भारतीय न्याय संहितेच्या कलम २८१, १०५, १२५(अ), १२५(ब) आणि मोटार वाहन कायद्याच्या कलम १८५ अन्वये आरोप निश्चित केले आहेत.