पणजी: गणेशोत्सवाच्या पार्श्वभूमीवर पणजीत मांडवी किनाऱ्यावर सालाबादप्रमाणे भरणाऱ्या अष्टमीच्या फेरीला रविवारी खरेदीदारांची मोठी गर्दी दिसून आली. या परिसराला जणू जत्रेचेच स्वरूप प्राप्त झाले होते.

अष्टमीच्या फेरीत कपड्यांपासून फर्निचर आणि मोबाइलच्या ॲक्सेसरीजपासून स्वयंपाकाच्या भांड्यापर्यंतच्या वस्तू विक्रीस उपलब्ध आहेत. नवविवाहितांच्या घरी ओझे देण्याची प्रथा हळूहळू कमी होत असल्याने घरगुती वापरासाठी लागणाऱ्या वस्तू खरेदीदारांचीच गर्दी या फेरीत होत असते.

विशेष करून परराज्यातील आणि गोव्यात येऊन स्थायिक झालेले, भाडेकरू अशा लोकांचा फर्निचर खरेदीकडे अधिक ओढा असतो. आज फर्निचरच्या दुकानात फर्निचर पाहण्यासाठी गर्दी दिसून आली.काही खरेदीदारांनी वस्तूही अगाऊ रक्कम देऊन निश्चित करण्यात आल्या.

सुविधांचा अभाव

अष्टमीच्या फेरीत चारशे-साडेचारशेच्यावर दुकाने थाटली जातात, हे माहीत असतानाही महानगरपालिका आवश्यक त्या सुविधा उपलब्ध करण्यात यशस्वी ठरलेली नाही असे दिसते. फिरत्या शौचालयाचे नऊ युनिट उभारलेत, यावरून सुविधांचा अंदाज बांधता येतो.