पणजी: पणजी मार्केट परिसरातील महानगरपालिकेच्या मालकीच्या फाल्कन अपार्टमेंटच्या शेजारील तीन मजली असुरक्षित झालेली आणि गतवर्षी २३ मे रोजी सीलबंद केलेली इमारत पाडण्यास सुरुवात झाली.

महानगरपालिकेने नेमलेल्या खासगी कंत्राटदाराने आज सकाळी ११ वाजता जेसीबीच्या साह्याने इमारतीचे बांधकाम हटवण्यास सुरुवात केली. त्यामुळे पोषाख हॉटेलसमोरील रस्त्यावरील वाहतूक बंद करण्यात आली होती.

महानगरपालिकेच्या असुरक्षित इमारतींच्या यादीत ही इमारत होती. त्यामुळे गेल्यावर्षी इमारतीच्या तळभागात १३ भाडेकरू दुकानदार होते, त्यांना नोटीस बजावून ही इमारत सील केली होती. त्याचबरोबर हा परिसर पूर्णतः लोकांना ये-जा करण्यास बंद करण्यात आला होता. पावसाळ्यापूर्वी ही धोकादायक इमारत हटवण्याचे काम महानगरपालिकेने हाती घेतल्याचे दिसते.

जेसीबीच्या साह्याने इमारतीच्या भिंती सुरुवातीला हटवण्यात आल्या आहेत, त्याचबरोबर शेजारील बंद दुकानेहीही हटवण्यात आली आहेत. बांधकाम पाडण्याचे काम सुरू होणार असल्याने महानगरपालिकेने त्यापूर्वीच शेजारील इमारतीत असणारी फाल्कन इमारत खाली केली आहे.

उच्च न्यायालयाचा हिरवा झेंडा

बाजाराच्या असुरक्षित इमारतीजवळील गाळेधारकांना मोठा दिलासा देताना, उच्च न्यायालयाने या इमारतीच्या पाडकामाला परवानगी दिली आहे. सर्व गाळ्यांचे नूतनीकरण करून ते पूर्ववत केले जातील, या पणजी महानगरपालिकेने दिलेल्या आश्वासनाची दखल घेऊन न्यायालयाने हा निर्णय दिला आहे.

पाडकाम पूर्ण झाल्यानंतर, सध्याच्या गाळेधारकांकडेच पुन्हा ताबा सोपवला जाईल, असे निर्देशही न्यायालयाने दिले आहेत. तथापि, अशा प्रकारे ताबा परत दिला गेल्याने गाळेधारकांच्या बाजूने कोणताही नवीन हक्क, हितसंबंध किंवा मालकीहक्क निर्माण होणार नाही, असेही न्यायालयाने स्पष्ट केले आहे.

अहवालानंतर झाली कारवाई!

महानगरपालिकेने या कारवाईसाठी पालिका अधिनियमा''च्या कलम २७२ अन्वये प्राप्त अधिकारांचा वापर केला. या कलमानुसार, महापालिकेला असुरक्षित इमारतींमधील रहिवाशांना नोटिसा बजावण्याचा आणि त्यांना इमारतीतून बाहेर काढण्याचा अधिकार प्राप्त होतो.

गोवा अभियांत्रिकी महाविद्यालयाच्या (जीईसी) स्थापत्य अभियांत्रिकी विभागाने सादर केलेल्या अहवालात ही इमारत असुरक्षित असल्याचे घोषित केले होते. या अहवालाचा आधार घेत, महानगरपालिकेने १३ भाडेकरूंना बाहेर काढले आणि त्यानंतर इमारत पाडण्याचा निर्णय घेऊन ती सील केली होती. आता ती इमारत पाडण्यात आली.