Benaulim ZP By-Poll

येत्या २३ जूनला होणाऱ्या दहा पंचायत प्रभाग पोटनिवडणुकीसाठी आज पाचव्या दिवशी ७ उमेदवारी अर्ज दाखल झाले आहेत. त्यामुळे आतापर्यंत अर्ज दाखल झालेल्यांची संख्या १४ वर पोहचली आहे.

बाणावली जिल्हा पंचायत पोटनिवडणुकीसाठी अजूनही एकही अर्ज दाखल झालेला नाही. उमेदवारी अर्ज सादर करण्यासाठी शेवटचे दोन दिवस बाकी आहेत. या मतदारसंघात ‘आप’च्या उमेदवाराला पाठिंबा देण्याच्या इंडी आघाडीमुळे काँग्रेस कार्यकर्त्यांमध्ये नाराजी आहे व धुसफूस सुरू झाली आहे.

सुकूर पंचायतीच्या प्रभाग १० मधून सुभाष रामनाथ हळर्णकर व हेरंब हरेश हळर्णकर या दोघांनी, वळवई प्रभाग २ मधून अंकिता अंकुश नाईक, कुंडई प्रभाग ७ मधून सजना सुदेश नाईक, बोरी प्रभाग ११ मधून दत्तेश रमेश नाईक, राशोल प्रभाग ५ मधून मिफा तेरिन डायस व सेरावली प्रभाग २ मधून जुलियेटा गोम्स यानी आज उमेदवारी अर्ज संबंधित तालुक्याच्या मामलेदार कार्यालयात दाखल केले.

आतापर्यंत सुकूर व वळवई पंचायतमधून प्रत्येकी ३, सेरावलीमधून २ तर कुडणे, कुंडई, केरी, बोरी, असोल्णा, राशोल पंचायतीमधून प्रत्येकी एक अर्ज दाखल झाला आहे. शेल्डे पंचायतीमधून एकही अर्ज दाखल झालेला नाही.

बाणावली जिल्हा पंचायत मतदारसंघातून भाजप किंवा इंडी आघाडीच्या उमेदवारांनी अर्ज दाखल केलेला नाही. इंडी आघाडीमध्ये उमेदवारीवरून धुसपूस सुरू आहे.