काणकोण: पहलगाम येथे झालेल्या दहशतवादी हल्ल्यानंतर भारतात पाकिस्तानविरोधात रोष व्यक्त केला जात आहे. गोव्यात काणकोण येथे रस्त्यावर दोन ठिकाणी रंग वापरुन पाकिस्तानी ध्वज साकारण्यात आला आहे. यावरुन भाजपकडून या विरोधात पोलिसांत तक्रार दाखल करण्यात आलीय. तर काँग्रेस नेते सुनील कवठणकरांनी देखील यावरुन आक्षेप नोंदवत संबधित व्यक्ती विरोधात कारवाईची मागणी केलीय.

विधानसभेचे सभापती रमेश तवडकरांनी याप्रकरणी काणकोण पोलिस स्थानकात तक्रार दाखल केली. अनोळखी व्यक्तीविरोधात कारवाई करण्याची मागणी तवडकरांनी तक्रारीतून केलीय. पाकिस्तानी ध्वज काणकोण पालिकेच्या तीन वेगवेगळ्या ठिकाणी साकारण्यात आला आहे. याप्रकरणी संबधित दोषी व्यक्तीवर भारतीय न्याय संहितानुसार कारवाई करण्याची मागणी तवडकरांनी केली आहे.

यापूर्वी गोवा प्रदेश काँग्रेसचे उपाध्यक्ष सुनील कवठणकरांनी याप्रकरणी कारवाईची मागणी केली. देशात अशा पद्धतीने पाकिस्तानी ध्वज साकारला जाऊ नये, त्याऐवजी तो जाळून टाकावा, असे कवठणकर म्हणाले. कोणाला निदर्शन करायचे असल्यास ते खुल्या पद्धतीने करावे, असेही कवठणकर म्हणाले.

गिरिराज पै वेर्णेकरांची कवठणकरांवर टीका

पाकिस्तानी ध्वज रस्त्यावर साकारला म्हणून सुनील कवठणकर का रडतायेत? त्यांची तिथेच जागा आहे. पाकिस्तानचा अपमान केला म्हणून भारतीय नागरिकाला अटक करावी, अशी त्यांची मागणी आहे? पाकिस्तानसोबत उभं राहून अशाच पद्धतीने काँग्रेस नेते कोसळले आहेत, अशा शब्दात वेर्णेकर यांनी कवठणकरांवर टीका केली आहे.