Illegal Construction: अमरा बाय द सी (कळंगुट) आणि लॉयड सेंट ज्यूड ज्योकिम फर्नांडिस यांनी कळंगुट गावात केलेली बांधकामे पाडून टाकण्याचा आदेश कांदोळी पंचायतीने जारी केला आहे. ही बांधकामे सागरी अधिनियमानुसारच्या 200 मीटर ना विकास क्षेत्रात करण्यात आल्याची तक्रार गोवा फाऊंडेशनने केली होती.

सदर आदेशानुसार आठ कुटिरे, तरण तलाव, सुरक्षा केबिनसह रिसेप्शन ब्लॉक, सिमेंट फ्लोअरिंग, कुंपण आणि सांडपाणी होल्डिंग टाकी पाडावी लागणार आहे. यापूर्वी केलेल्या पाहणीत ही बांधकामे आढळली होती.

तत्पूर्वी, 3 मार्च 2023 रोजी गोवा किनारी क्षेत्र व्यवस्थापन प्राधिकरणाने केलेल्या तपासणीवेळी गोवा फाऊंडेशनने सिद्ध केले होते की, काँक्रीट फाऊंडेशनसह आठ काँक्रीट संरचना या ठिकाणी उभारण्यात आल्या आहेत.

प्रत्येकामध्ये सुमारे तीन-चार खोल्या आहेत. तसेच एक जलतरण तलाव, सांडपाणी प्रक्रिया केंद्र आणि इतर संरचना उभारणी आहे. प्रत्यक्षात गोवा किनारा क्षेत्र व्यवस्थापन प्राधिकरणाने फक्त तात्पुरत्या लाकडी कुटिरांसाठी ना हरकत दाखला दिला होता.

गोवा राज्य प्रदूषण नियंत्रण मंडळाने हवाई आणि जल कायद्यांतर्गत संमतीसाठी अमरी बाय द सीचा अर्ज यापूर्वीच फेटाळला आहे. तत्पूर्वी, मुंबई उच्च न्यायालयाच्या तपशीलवार आदेशानंतर परिसराचा सर्व ताबा निलंबित करण्यात आला होता.