पणजी: गेल्‍या अडीच वर्षांपासून पोलिसांना हुलकावणी देणारा आणि ऑनलाइन सट्टेबाजीचा मास्टरमाईंड बाबू खेमानीच्या अखेर मुंबईत रायपूर पोलिसांनी मुसक्या आवळल्या. सट्टेबाजी प्रकरणी मुंबई आणि गोवा येथे एकाच वेळी टाकलेल्या छाप्यात पोलिसांनी खेमानी याच्यासह सात प्रमुख आरोपींना अटक केली.

आतापर्यंत या गुन्ह्यात एकूण २७ जणांना अटक झाली आहे. आयपीएल क्रिकेट सुरू असल्याने त्याचा फायदा उचलण्याचा त्याने प्रयत्न सुरू केले होते. तो देशभरातील बुकीज व एजंट्समार्फत लोकांपर्यंत आयडी आणि पॅनेल पोहोचवत असे.

छत्तीसगढ येथील रायपूरच्या रेल्वेस्थानकाच्या परिसरात पोलिसांना या प्रकरणाचा १३ रोजी सुगावा मिळाला. त्यानुसार स्थानिक पोलिसांनी रात्र गस्तीच्यावेळी एका संशयितास ताब्यात घेतले होते, कारमध्ये बसून तो सट्टा खेळत असल्याचे आढळले होते.

त्याच्याकडे पोलिसांनी अधिक चौकशी केल्यानंतर गुन्हे प्रतिबंध व सायबर युनिटच्या पथकाने ओडिसा आणि महाराष्ट्रासह इतर राज्यांत शोधमोहीम सुरू केली. पोलीस उपायुक्त स्मृतिक राजनाला यांच्या नेतृत्वाखाली पथकाने मुंबईतून बाबू खेमानीसह रोहित सिंह आणि विशाल कश्यप यांच्या मुसक्या आवळल्या. तर गोवा येथील ऑनलाइन पॅनेलवर कारवाई करून वैभव खंडेलवाल, लक्ष्मण ढोबरे, रणजीत कुमार पासवान आणि आशिष जाधव या चार संशयितांना ताब्यात घेण्यात आले.

६० लाखांचे साहित्य जप्त

ताब्यात घेतलेल्या टोळीकडून जप्त केलेल्या साहित्याची किंमत ६० लाख रुपयांहून अधिक आहे. यामध्ये मोबाईल फोन, एलईडी टीव्ही, वाय-फाय राउटर, लॅपटॉप, रोख रक्कम आणि एक बीएमडब्ल्यू कार अशा मुद्देमालाचा समावेश आहे.