राज्यात कालपासून पुन्हा पावसाचा जोर वाढला असून राज्यातील बहुतांश भागात दमदार पर्जन्यवृष्टी सुरू आहे. आजपासून पुढील तीन दिवस राज्यात मोठ्या प्रमाणात पाऊस पडण्याची शक्यता गोवा वेधशाळेद्वारे वर्तविली असून तीन दिवस ऑरेंज अलर्ट जारी केला आहे. शनिवारी राज्यात अनेक ठिकाणी पडझडीच्या घटना घडल्या.

मडगावात झाड पडून एक महिला जखमी झाली. राज्यात दमदार पाऊस पडणार असल्याने नागरिकांनी योग्य ती काळजी घ्यावी, मोठ्या प्रमाणात पाऊस पडत असताना शक्यतो पाण्याच्या ठिकाणी जाऊ नये, असा सल्ला गोवा वेधशाळेने दिला आहे. मच्छीमारांनीही खोल समुद्रात न जाण्याचा इशारा देण्यात आला आहे.

डिचोलीत बागायतींचे लाखोंचे नुकसान

कोसळधार पावसाचा डिचोलीतील व्हावटी भागाला मोठा फटका बसला असून येथील कुळागारांची मोठ्या प्रमाणात नासधूस झाली आहे. पावसाच्या तडाख्यात बागायती पिकाची हानी झाली असून, बागायतदारांचे लाखो रुपयांचे नुकसान झाले आहे.

याबाबत पंचायतीला कळवूनसुद्धा पंचायत किंवा अन्य प्रशासकीय यंत्रणेकडून नुकसानीची पाहणी करण्याकडे दुर्लक्ष केले जात आहे, अशी व्यथा व्हावटी येथील बागायतदारांनी मांडली.

साळगाव येथे भिंत कोसळली

जोरदार पडणाऱ्या पावसामुळे क्रुझवाडो, साळगाव येथे एका घराची भिंत कोसळून दीड लाखाचे नुकसान झाले. सुदैवाने या दुर्घटनेत जीवितहानी टळली.

मडगाव ते बाणावली प्रवास असा करत असताना मारिया हॉलजवळ एक माड अचानक कोसळल्याने एक दुचाकीचालक महिला जखमी झाली. या महिलेला उपचारासाठी दक्षिण गोवा जिल्हा रुग्णालयात दाखल करण्यात आले आहे.