Mapusa Crime म्हापसा बोडगिणी येथे एका व्यक्तीचा मृतदेह सापडल्याची खबर पोलिसांना शनिवारी मिळाली होती. या मृतदेहाच्या गळ्यावर बाटलीच्या काचेने वार केल्याचे पोलिसांच्या निदर्शनास आले होते. या घटनेच्या तपासाअंती पोलिसांनी आज संशयित करण शिंदे नामक 19 वर्षीय तरुणाला अटक केलीय.

याविषयी सविस्तर माहिती अशी की, या घटनेच्या तपासासाठी पोलिसांनी म्हापसा परिसरातील सीसीटीव्ही फुटेज तपासले असता त्यांना असे आढळून आले की, संबंधित मृत नबिन बीके (रा. नेपाळ) ही व्यक्ती पहाटे 3 वाजता एका अज्ञात व्यक्तीसोबत आढळून आली.

सीसीटीव्ही फुटेजच्या आधारे म्हापसा पोलिसांनी संशयित तरुणाचा शोध सुरु केल्यावर अखेर आज 17 एप्रिल रोजी करण महादेव शिंदे नामक 19 वर्षीय तरुणाला अटक केलीय.

करण शिंदेची कसून चौकशी केली असता त्याने गुन्ह्यात सहभाग असल्याची कबुली दिली. यावेळी त्याने असे सांगितले की, शनिवारी पहाटे मयताला भेटल्यावर त्यांनी दारू पिण्याचे ठरवले.

याच दरम्यान त्यांच्यात अचानक भांडण सुरू झाले. त्यावेळी आरोपीने नबिन यांच्या मानेवर आणि गळ्यावर तुटलेल्या काचेच्या बाटलीने वार केल्याचे शिंदे याने पोलिसांना सांगितले.

या तपास कामात पर्वरी एसपी (नॉर्थ) श्री, निधिन वालसन आयपीएस, एसडीपीओ म्हापसा जिवबा दळवी, यांच्या देखरेखीखाली पीआय परेश नाईक म्हापसा पीएसआय सुनील पाटील, पीएसआय विराज कोरगावकर, पीएसआय बबलो परब, हेडकॉन्स्टेबल सुशांत चोपडेकर, पोलीस कॉन्स्टेबल प्रकाश पोळेकर, आनंद राठोड, अक्षय पाटील आणि राजेश कांदोळकर यांनी सहभाग घेतला होता.