Goa Drug Case : वानेली कोलवा येथील एका भाड्याच्या खोलीवर छापा टाकून 5 किलो 100 ग्राम वजनाचा गांजा कोलवा पोलिसांनी जप्त केला आणि या प्रकरणात एकाला अटक केली आहे.

इरफान अहमद (20) असे संशयित आरोपीचे नाव आहे. ही कारवाई 30 जानेवारी रोजी रात्रीच्या वेळी करण्यात आली. या विषयीची माहिती प्राप्त झाल्यानंतर कोलवा पोलीस स्थानकाचे पोलीस निरीक्षक थेरोंन डिकॉस्ता यांच्या मार्गदर्शनाखाली पोलीस पथकाने भाड्याच्या खोलीची झडती घेतली.

यामध्ये त्यांना लाल रंगाच्या सुटकेसमध्ये प्लास्टिक पिशवीत गुंडाळून ठेवण्यात आलेला 100 ग्राम वजनाचा गांजा आढळून आला.

याची किंमत 5 लाख 10 हजार रुपये अशी आहे. अटक करण्यात आलेला संशयित आरोपी मायणा येथील रहिवाशी आहे. याप्रकरणी कोलवा पोलिसांकडून पुढील तपास सुरू आहे.

दरम्यान, देशभरातील अनेकांची 100 कोटी रुपयांची फसवणूक करणाऱ्या एरिक हेन्री वाझ (37) याला जुने गोवा पोलिसांनी सोमवारी अटक केली. याबद्दलची माहिती उत्तर गोव्याचे एसपी निधीन वलसान यांनी दिली.