Goa Tourism: प्रेम व्यक्त करण्याचा दिवस असलेला व्हॅलेंटाईन डे काही दिवसांवर आला आहे. त्या पार्श्वभुमीवर तसेच येत्या काळात गोव्यात होणाऱ्या कार्निव्हलसाठी पर्यटकांचा गोव्याकडे ओघ सुरू झाला आहे.

या काळात गोव्यातील अनेक हॉटेल्समध्ये बुकिंग झाल्याचे समोर येत आहे. हॉटेल्समध्ये सुमारे 80-90 % बुकिंग झाल्याचे कळते. त्यामुळे व्यावसायिकांनाही चांगल्या उलाढालीची अपेक्षा आहे.

व्हॅलेंटाईन डे सेलिब्रेट करण्यासाठी तरूणाईची पसंती गोव्याला असते. त्यामुळेही बुकिंगच्या संख्येत वाढ झाल्याचे दिसते आहे. उत्तर गोव्यात नाईट लाईफचे आकर्षण पर्यटकांना असते. तसेच आकर्षण व्हॅलेंटाईन डे च्या पार्ट्यांचेही आहे. या काळात गोव्यात अनेक पार्ट्या होत असतात.

फेब्रुवारीच्या दुसऱ्या आठवड्यात कार्निव्हलसाठी येणाऱ्यांच्या संख्येत वाढ झाल्यामुळे हॉटेल बुकिंगचे प्रमाण 15 ते 20 टक्क्यांनी वाढणार आहे. कोरोना महारोगराईमुळे गेल्या दोन वर्षात उत्सवांवर बरीच बंधने आली होती.

त्यामुळे यंदाचा कार्निव्हल मोठा होण्याची अपेक्षा आहे. याशिवाय लग्न आणि इतर समारंभांमुळेही हॉटेल्सच्या बुकिंगमध्ये वाढ दिसून आली आहे.

डिसेंबर आणि जानेवारी या काळात हॉटेल बुकिंग्ज 85 ते 90 % होती. गेल्या दोन महिन्यात तारांकित हॉटेल्सप्रमाणेच छोट्या हॉटेल्सनीही चांगला व्यवसाय केला आहे. आगामी काळात हॉटेलमधील बुकिंग्ज 100 टक्क्यांपर्यंत जाऊ शकते.

दरवर्षीच या काळात गोव्यात पर्यटकांचा ओघ वाढत असतो. त्यामुळे व्यावसायिकांसाठी हा काळ उत्तम मानला जातो. व्हॅलेंटाईन डे संस्मरणीय करण्यासाठी अनेक कपल्स गोव्याची निवड करत असतात. त्यातून यंदाही गोव्यातील हॉटेल बुकिंग्जमध्ये व्हॅलेंटाईन डेच्या पार्श्वभुमीवर वाढ दिसून आली आहे.