Traffic Violations In Goa: नाताळ आणि नवीन वर्षाचे (X’mas & New Year) स्वागत करण्यासाठी गोव्यात येणाऱ्या पर्यटकांची संख्या वाढली आहे. राज्यातील वाहतूक व्यवस्था, कायदा व प्रशासन व्यवस्थित रहावे यासाठी गोवा पोलिस (Goa Police) सतर्क झाले आहेत. विशेषत: राज्यातील वाढलेल्या अपघातांची संख्या लक्षात घेता, पोलिसांनी वाहतूक नियमांचे उल्लघंन करणाऱ्यांवर कडक कारवाईचे धोरण अवलंबले आहे. दक्षिण गोव्यात सलग दुसऱ्या दिवशी देखील पोलिसांनी वाहतूक नियमांचे उल्लंघन (Traffic Violation) करणाऱ्यांविरोधात कारवाई करत दंड वसूल केला.

दक्षिण गोव्यात वाहतूक पोलिस आणि स्थानिक पोलिस ठाण्याच्या पोलिसांनी संयुक्तविद्यामाने कारवाई केली. वाहतूक नियमांचे उल्लंघन करणाऱ्या 194 वाहन चालकांवर पोलिसांनी कारवाई केली. या कारवाईत पोलिसांनी 1 लाख 60 हजार रूपयांचा दंड वसूल केला. नाताळ आणि नवीन वर्षाच्या पार्श्वभूमीवर ही कारवाई सुरूच राहणार आहे. तसेच, वाहतूक नियमांचे उल्लंघन करणाऱ्यांची गय केली जाणार नसल्याचे पोलिसांनी म्हटले आहे.

गुरूवारी देखील अशाच पद्धतीने पोलिसांनी कारवाई केली होती. यामध्ये वाहतूक नियमांचे उल्लंघन करणाऱ्या 151 वाहन चालकांवर पोलिसांनी कारवाई करत, 1 लाख 8 हजार 500 रूपयांचा दंड वसूल केला होता. वाहतुकीला शिस्त लागावी, राज्यातील अपघातांच्या प्रमाणात घट व्हावी यासाठी राज्य सरकारने अल्पवयीन मुले वाहन चालविताना आढळल्यास थेट वाहनमालकाला अटक करण्याचा कठोर निर्णय घेतला असल्याचे मुख्यमंत्री प्रमोद सावंत यांनी सांगितले आहे.