पेडणे: गेले दोन आठवडे गोव्यातील तांबोसे आणि उगवे भागात शेती-बागायतीचे अतोनात नुकसान करणाऱ्या ओंकार हत्तीने आपला मुक्काम सातोसे (जि. सिंधुदुर्ग) भागात हलविला. यामुळे गेले काही दिवस हत्तीच्या दहशतीखाली असलेल्या तांबोसे आणि उगवे गावातील लोकांनी सुटकेचा नि:श्वास सोडला.
गोमंतकीयांसाठी ही दिलासादायक बाब असली, तरी सिंधुदुर्ग जिल्ह्यातील लोकांसाठी तो हत्ती मोठी डोकेदुखी बनला आहे. सातोसे गावात पोचल्यानंतर ओंकार हत्तीने तेथील रहिवासी भागात प्रवेश केल्याने लोकांचे धाबे दणाणले आहे.
लोकांनी फटाके आणि ढोल-ताशे वाजवून त्याला रहिवासी भागामधून गावालगतच्या शेतात पिटाळले. असे असले, तरी तेथील लोक हत्तीच्या दहशतीखाली आहेत. महाराष्ट्र वन खात्याचे अधिकारीही या हत्तीवर बारीक लक्ष ठेवून आहेत.
सिंधुदुर्ग जिल्ह्यामधील वन खात्याने सातोसे येथील लोकांना या हत्तीपासून सावध राहण्याचे आवाहन केले आहे. मात्र, या हत्तीला पुन्हा गोव्याच्या हद्दीच्या दिशेने हाकलून लावण्याचा प्रयत्न झाल्यास तो परत गोव्यात येऊ शकतो. तो राज्यात शिरू नये, यासाठी गोवा वन खात्याचे कर्मचारी सतर्क राहिले आहेत.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.