Oli Leakage on Road : पणजी-फोंडा मार्गावर कंटेनरमधून ऑईल गळती झाल्याची घटना समोर आली आहे. यामुळे अनेक वाहनांचा अपघात झाला. आज मंगळवारी सकाळी खोर्ली परिसरातून ऑईल गळतीस सुरुवात झाली होती. हा कंटेनर कुंडईमध्ये सापडला.

आज सकाळी पणजी-फोंडा मार्गावर खोर्ली येथून ते बाणस्तारी पुलापर्यंत रस्त्यावर ऑईल सांडल्याने रस्ता निसरडा बनला होता. सकाळी 8.20 वाजता ही घटना घडल्याचं अग्निशमन दलाच्या अधिकाऱ्यांनी सांगितलं. ऑईल सांडल्यामुळे अनेक वाहनांचा अपघातही झाल्याची माहिती आहे. काही लोकांनी ऑईल गळती झालेल्या कंटेनरचा पाठलाग केला. कुंडई येथील एका पेट्रोल पंपावर हा कंटेनर उभा करण्यात आला होता.

दरम्यान या कंटेनरमधून मोठ्या प्रमाणावर ऑईल गळती होत असल्याने खोर्लीपासून फोंड्याच्या मार्गावर अनेक वाहने घसरल्याने अपघात झाल्याचं पाहायला मिळालं. हे ऑईल नेमकं कोणत्या प्रकारचं होतं याची माहिती मात्र मिळू शकलेली नाही. आपत्कालीन सेवेच्या कर्मचाऱ्यांनी ऑईल सांडलेल्या ठिकाणी वाळू आणि माती टाकून रस्ता वाहतुकीस योग्य केला. मात्र सकाळच्या वेळात ही ऑईल गळती झाल्याने प्रवाशांचे चांगलेच हाल झाल्याचं पाहायला मिळालं. काही ठिकाणी वाहतूक कोंडीही पाहायला मिळाली.