पणजी: जुने गोवे परिसरातील रेल्वे फाटक क्रमांक ३७ येथे उभारण्यात येत असलेल्या रस्ता उड्डाणपुलाच्या बांधकामामुळे एला येथील फिशरमन ट्रेनिंग सेंटर ते गवंडाळी येथील धेंपो फुटबॉल मैदानादरम्यानचा रस्ता तात्पुरता बंद ठेवण्याचा कालावधी आता ३१ डिसेंबर २०२६ पर्यंत वाढविण्यात आला आहे. गोवा राज्य पायाभूत सुविधा विकास महामंडळाने यासंदर्भातील अधिसूचना जारी केली आहे.

या मार्गावरील उड्डाणपुलाचे काम युद्धपातळीवर सुरू असून नागरिकांच्या सुरक्षिततेच्या दृष्टीने आणि बांधकाम प्रक्रियेत कोणताही अडथळा निर्माण होऊ नये यासाठी हा निर्णय घेण्यात आल्याचे सांगण्यात आले आहे. वाढत्या वाहतुकीच्या पार्श्वभूमीवर रेल्वे फाटकावरील वाहतूक कोंडी कमी करणे आणि प्रवास अधिक सुरक्षित व सुरळीत करणे हा या प्रकल्पाचा मुख्य उद्देश आहे.

अधिसूचनेनुसार रस्ता दररोज दोन वेळा बंद ठेवण्यात येणार आहे. रात्री ९ ते सकाळी ६ या कालावधीत तसेच सकाळी १० ते सायंकाळी ५ या वेळेत सर्व प्रकारच्या वाहनांना या मार्गावरून वाहतूक करण्यास मनाई असेल. त्यामुळे या परिसरातून नियमित प्रवास करणाऱ्या वाहनचालकांना पर्यायी मार्गांचा वापर करावा लागणार आहे. बंदीच्या कालावधीत जड व हलक्या वाहनांसाठी बाणस्तरी मार्ग हा प्रमुख पर्यायी मार्ग म्हणून उपलब्ध राहणार आहे.

सूचनांचे पालन करा!

बांधकामाच्या काळात प्रवाशांनी प्रवासाचे नियोजन करावे, पर्यायी मार्गांचा वापर करावा. सूचनांचे पालन करावे, असे आवाहन करण्यात आले आहे. महामंडळाने नागरिकांसाठी संपूर्ण वळण मार्ग आराखडा आपल्या संकेतस्थळावर उपलब्ध करून दिला आहे. त्याचा उपयोग करावा, असेही अधिसूचनेत नमूद केले आहे.