खुरसावाडो-दिवाडी (Khursawado-Divar) येथे शुक्रवारी ( दि.16) रात्रीच्या सुमारास अज्ञाताने छत्रपती शिवाजी महाराजांच्या पुतळ्याची नासधूस करत पळ काढला होता. यावरुन खुरसावाडो-दिवाडी परीसरात वातावरण चांगलेच तापले असून या प्रकरणात पोलिसांनी आज 7 जणांना नोटीस पाठवल्या आहेत.

मिळालेल्या माहितीनुसार काल शुक्रवारी (दि.16) खुरसावाडो-दिवाडी येथे अज्ञात व्यक्तीने छत्रपती शिवाजी महाराजांच्या पुतळ्याची जाणीवपुर्वक नासधूस केली असल्याचा प्रकार रात्री पुतळ्याची पुजा करण्याच्या वेळी उघड झाला होता.

यावरुन स्थानिकांनी ओल्ड गोवा पोलिसात तक्रार दाखल करत गुन्हेगारांना लवकरात लवकर अटक करा अशी मागणी केली होती. यापार्श्वभूमीवर आज पोलिसांनी आज 7 जणांना नोटीस बजावली आहे. तसेच पोलिसांनी लवकरात लवकर गुन्हेगारांना अटक करण्यात यश मिळेल असे ही म्हटले आहे.

स्थानिकांचा संताप कायम

या घटनेवरुन स्थानिकांनी आक्रमक भुमिका घेतली आहे. पोलिसांनी लवकरात लवकर अटक करावी. तसेच या प्रकरणात सामिल असलेल्या सर्वांवर कारवाई करावी अशी मागणी केली आहे. रात्री पुतळ्याची पुजा करत असताना स्थानिकांच्या हा प्रकार समोर आला होता. यानंतर पोलिसात धाव घेत स्थानिकांनी कारवाईची मागणी केली आहे.