Old Goa Police Arrested Theft At Kavathe Mahankal Sangli

तिसवाडी: जुने गोवे येथे झालेल्या घरफोडीच्या तक्रारीवरून सराईत गुन्हेगार लोकेश सुथार (३०, सांगली-महाराष्ट्र) याला महाराष्ट्रातील कवठे महाकाळ येथे ताब्यात घेण्‍यात आले. त्‍यानंतर जुने गोवे पोलिसांनी त्याला आपल्‍या पोलिस ठाण्यात आणून अटक केली. गोवा आणि महाराष्ट्रात सुमारे १०० घरफोड्यांमध्ये त्याचा सहभाग आहे.

२८ सप्टेंबर रोजी सीमा सिंग (५०, जुने गोवे) यांच्या तक्रारीवरून पोलिसांनी तपास सुरू केला होता. एसएफएक्स कॉलनी येथे मित्राच्या फ्लॅटमधून चोरट्यांनी तीन हजार रोख रक्कम आणि इतर मौल्यवान वस्तू चोरल्याचा उल्लेख तक्रारीत करण्यात आला होता. जुने गोवे पोलिसांनी भारतीय न्याय संहितेच्या कलम ३०५ नुसार तक्रार नोंद केली होती.

तपासादरम्यान, धागेदोरे जुळवून आणि गुप्तचर स्रोतांद्वारे संशयितांची ओळख लोकेश रावसाहेब सुथार अशी झाल. जुने गोवे पोलिसांच्या पथकाने मिरज, सांगली आणि महाराष्ट्राच्या इतर भागांना थोड्या अंतराने तीन वेळा भेट दिली. कवठे महाकाल पोलिस आणि सांगली ग्रामीण पोलिसांच्या

मदतीने लोकेशचा शोध घेऊन त्याला ताब्यात घेतले. चौकशीदरम्यान लोकेशने घरफोडी केल्याची कबुली दिली.

रत्‍नागिरी, पुण्‍यात केल्‍या बहुतांश घरफोड्या

संशयित लोकेश हा महाराष्ट्रातील रत्नागिरी, पुणे इत्यादी येथील विविध घरफोड्यांच्या गुन्ह्यांमध्ये आरोपी आहे. महाराष्ट्रात सुमारे १०० गुन्ह्यांमध्ये त्याचा शोध सुरू होता. जुने गोवे पोलिस निरीक्षक सतीश पडवळकर यांच्या मार्गदर्शनाखाली पुढील तपास सुरू आहे.