खांडोळा: जुने गोवे- गवंडाळी रस्त्यावर रेल्वेमार्गावर उड्डाणपुलाचे बांधकाम सुरू करण्यात आले आहे. त्यामुळे सोमवार (दि.२३) पासून हा मार्ग वाहतुकीसाठी बंद करण्यात येणार आहे. रविवारी सुटीचा दिवस असल्यामुळे काही प्रमाणात वाहतूक कमी होती, त्यामुळे काम जोरात सुरू होते. गवंडाळीच्या बाजूला खांब उभारण्यासाठी खोदाई करण्यासाठी यंत्रणा सज्ज करण्यात  आली आहे. काही ठिकाणी पत्रे उभारून रस्ता अरुंद केला आहे.

'या' वेळेत रास्ता असेल मोकळा

माध्यमांना मिळालेल्या माहितीनुसार, गवंडाळी धावजेचा रस्ता सकाळी दहा वाजेपर्यंत आणि संध्याकाळी पाचनंतर वाहतुकीसाठी खुला ठेवला जाईल. सकाळी १० ते संध्याकाळी ५ वाजेपर्यंत रस्ता बंद ठेवण्यात येणार असल्याची माहिती कुंभारजुव्याचे आमदार राजेश फळदेसाई यांनी दिली.

मोठ्या प्रमाणात लोकं कामा धंद्यानिमीत्त ह्या रस्त्याने पणजीत येत असल्याने सकाळी आणि संध्याकाळी त्याची गैरसोय टाळण्यासाठी हा निर्णय घेण्यात आला असल्याची माहिती त्यांनी दिली आहे.

रस्ता अरुंद झाल्यामुळे चारचाकी वाहन चालविणे अडचणीचे होते आहे, शिवाय रेल्व फाटकाच्या पुढे जुने गोवेच्या बाजूनेही खांब उभे करण्याचे काम सुरू आहे. तेथेही अर्धा रस्ता अडविण्यात आहे. त्यामुळे तेथेही एकेरी वाहतूक सुरू आहे.

त्यामुळे दोन्ही बाजूला वाहने हाकताना अडचण होतेय. सोमवारपासून पूर्ण रस्ता बंद करण्यात येणार असल्याने वाहनचालकांना बाणास्तारी मार्गे पणजीला ये-जा करावी लागलं. माशेल, वाळपई, साखळीहून पणजी, वास्कोला जाणाऱ्यांना बाणास्तरीमार्गे थोड्या अधिक अंतराने प्रवास करावा लागणार आहे.

या पुलाच्या कामामुळे मच्छिमार प्रशिक्षण केंद्र, एला ओल्ड गोवा ते धेम्पो फुटबॉल ग्राउंड, गवंडाळी सोमवारपासून बंद ठेवण्यात येणार आहे. इतर रस्ता स्थानिकांसाठी खुला राहणार आहे. हा पूल कुंभारजुवा आणि माशेल येथे जाण्यासाठी तसेच वाळपई, साखळी, आमोणा, माशेल आणि बेळगाव येथून येणाऱ्या लोकांसाठी महत्त्वाचा आहे. पुलाचे काम पूर्ण झाल्यानंतर विनाअडथळा या मार्गावरून प्रवास करता येईल.