पणजी: जुने गोवे येथे २०२२ मध्ये झालेल्या प्राणघातक बसअपघातप्रकरणी चालक सदानंद रायकर याची मेरशी येथील प्रथम वर्ग न्यायालयाने निर्दोष मुक्तता केली. पोलिस तपासातील गंभीर त्रुटी आणि ठोस पुराव्यांचा अभाव यामुळे न्यायालयाने संशयितास संशयाचा लाभ दिला.

८ मे २०२२ रोजी धुळापी-खोर्ली येथे झालेल्या या अपघातात बिहारचा धर्मेंद्र माहतो (३२) हा पादचारी गंभीर जखमी होऊन उपचारादरम्यान मरण पावला होता. या घटनेनंतर रायकर (५३, रा. शिरोडा) यांच्यावर भारतीय दंड संहिता कलम २७९ व ३०४-अ अंतर्गत गुन्हा दाखल करण्यात आला होता.

२१ पानी निकालात न्यायाधीश अंकिता नागवेकर यांनी चौकशीत झालेल्या विसंगती व त्रुटींवर कठोर शब्दांत ताशेरे ओढले. मुख्य साक्षीदारांची साक्ष कुचकामी ठरली. पंच साक्षीदारांनीही कोऱ्या कागदावर सही केल्याची कबुली दिली किंवा पोलिसांचे ‘नेहमीचे साक्षीदार’ असल्याचे उघड झाले. त्यामुळे पुराव्यांचा विश्वासार्हपणा संशयास्पद ठरला.

दरम्‍यान, फौजदारी प्रक्रिया संहितेच्या कलम २४८(१) अंतर्गत संशयिताची मुक्तता करण्यात आली असून जामीननामा रद्द करण्यात आला आहे. मात्र, सरकार उच्च न्यायालयात आव्‍हान देणार असल्यास हजर राहण्यासाठी त्‍याला १० हजार रुपयांचा बाँड सादर करण्याचे निर्देश दिले आहेत. जवळपास तीन वर्षे या खटल्याची सुनावणी सुरू होती.