Goa Government on Tree Cutting: आता 100 किंवा त्याहून अधिक झाडे तोडण्याबाबतचा निर्णय वृक्ष प्राधिकरण घेणार आहे. वनविभागाचे अवर सचिव (वन) नाथीन आरावजो यांनी 15 जून रोजीच याबाबतची अधिसूचना प्रसिद्ध केली आहे. त्यानुसार झाडे तोडण्याचे कोणतेही प्रस्ताव आता वृक्ष प्राधिकरणाकडे पाठवले जातील.

“गोवा प्रिझर्वेशन ऑफ ट्रीज अॅक्ट, 1984 च्या कलम 35 अन्वये प्रदान केलेल्या अधिकारांचा वापर करून आणि वेळोवेळी सुधारणा केल्यानुसार, सरकारने ही अधिसूचना काढली आहे.

इमारतींचे बांधकाम, रस्ते बांधकाम, कारखाने, सिंचनाची कामे, इलेक्ट्रिक, टेलिफोन, टेलिग्राफिक आणि इतर वीजवाहिन्या टाकण्याच्या कामावेळी कुठल्याही विभागाला 100 हून अधिक झाडे तोडायची असल्यास तसे सर्व प्रस्ताव आता तत्काळ प्रभावाने वृक्ष प्राधिकरणाकडे पाठवले जावेत, असे निर्देश सरकारने दिले असल्याचे अधिसूचनेत नमूद करण्यात आले आहे.

दरम्यान, वृक्ष प्राधिकरण 1998 मध्ये स्थापन झाले होते पण 2012 पासून ते कार्यक्षम नाही. त्यामुळे गोव्यातील हरित क्षेत्र कमी होत चालल्याचे बोलले जात आहे.