कला अकादमीचा परिसर डासांचे उत्पत्तीस्थान बनला आहे. कला अकादमीच्या शेजारी विखुरलेल्या भंगार साहित्याची आरोग्य सेवा अधिकाऱ्यांनी तपासणी केली. तपासणीनंतर कला अकादमीला कारणे दाखवा नोटीस बजावून हे भंगार ताबडतोब हटविण्याची ताकीद दिल्याची माहिती आरोग्यसेवा विभागाच्या उपसंचालक डॉ कल्पना महात्मे यांनी दिली.

डॉ. कल्पना महात्मे म्हणाल्या की, आरोग्य सेवा कर्मचाऱ्यांनी कला अकादमी येथे जागेची पाहणी केली. ज्यामध्ये पार्किंगची जागा भंगार साहित्य टाकून अडवण्यात आली होती. आणि ते आता डासांचे उत्पत्तीस्थान बनले आहे. ज्यामुळे डेंग्यू मलेरियाचा प्रादुर्भाव होऊ शकतो.

तपासणीनंतर कला अकादमीला दोन वेळा कारणे दाखवा नोटीस बजावून सात दिवसांच्या आत भंगार काढून परिसर स्वच्छ करण्याचे निर्देश दिले आहेत. कला अकादमीने या सूचनेचे पालन न केल्यास अकादमीचे वीज व पाणी जोडणी तोडण्यासाठी पीडब्ल्यूडी आणि विद्युत विभागाला पत्रव्यवहार केला जाईल, असेही त्यांनी सांगितले.

जून महिन्यात ६० डेंग्यूचे रुग्ण

राज्यात जून महिन्यात एकूण ६० डेंग्यू रुग्ण आढळून आले आहेत. म्हापसामध्ये १७, साळगाव ८, साखळी ७, पर्वरी ५, कोलवाळ ४, कांदोळी ३, पीएचसी खोर्ली २ आणि कुठ्ठाळी २, पेडणे, हळदोण, डिचोली, शिवोली, मये, चिंबल, मडगाव, वास्को, फोंडा, शिरोडा, कासावली या ठिकाणी  प्रत्येकी १ असे डेंग्यूचे रुग्ण आढळले होते. जानेवारी ते जून २०२४ या कालावधीत आरोग्य विभागाकडे डेंग्यूचे एकूण १७७ रुग्णांची नोंद आहे.